Sllovenia të enjten vendosi një ndalim udhëtimi për kryeministrin e Izraelit, Benjamin Netanyahu, sipas një deklarate qeveritare, pasi vitin e kaluar njohu zyrtarisht Palestinën dhe në korrik ndaloi hyrjen e dy ministrave të kabinetit izraelit të ekstremit të djathtë.
“Me këtë veprim, Sllovenia konfirmon angazhimin e saj ndaj së drejtës ndërkombëtare, vlerave universale të të drejtave të njeriut dhe një politike të jashtme parimore dhe të qëndrueshme”, tha Neva Grasic, Sekretare e Shtetit në Ministrinë e Jashtme, sipas llogarisë X të qeverisë.
Anëtarja e BE-së, Sllovenia, vendosi një embargo armësh ndaj Izraelit në gusht dhe futi një ndalim për importin e mallrave të prodhuara në territoret palestineze të pushtuara nga Izraeli.
Grasiç tha se qeveria veproi kundër Netanyahut sepse ai akuzohet nga Gjykata Ndërkombëtare e Drejtësisë për kryerjen e krimeve të luftës në Gaza.
“Publiku është në dijeni se kundër tij po zhvillohen procedura për kryerjen e krimeve të luftës dhe krimeve kundër njerëzimit”, tha Grasiç.
“Me këtë vendim, qeveria po i dërgon një mesazh të qartë shtetit të Izraelit se Sllovenia pret respektim të vazhdueshëm të vendimeve të gjykatave ndërkombëtare dhe të drejtës ndërkombëtare humanitare”, shtoi ajo.
Vendi i vogël alpin, së bashku me vendet e tjera evropiane, ka bërë vazhdimisht thirrje për një armëpushim në Gaza dhe për rritjen e shpërndarjes së ndihmave në enklavë.
Në korrik, qeveria vendosi një embargo mbi eksportet, importet dhe tranzitin e armëve për në dhe nga Izraeli, dy javë pasi shpalli ministrin e sigurisë kombëtare të Izraelit, Itamar Ben-Gvir, dhe ministrin e financave, Bezalel Smotrich, persona non grata për “deklarata gjenocidale” dhe nxitje të dhunës kundër palestinezëve.
