115 kilogramë kokainë në kamion, arrestohet shoferi shqiptar në Francë
Një 50-vjeçar shqiptar ka përfunduar në prangat e policisë franceze, pasi autoritetet zbuluan një sasi prej 114.6 kilogramësh kokainë të fshehur në kamionin që ai drejtonte.
Operacioni u zhvillua gjatë natës mes 18 dhe 19 nëntorit, në pikën e pagesës së autostradës në Arles të Francës.
Kamioni, i cili kishte targa italiane, transportonte mallra ushqimore për një kompani të madhe tregtare. Gjatë kontrollit rutinë, doganierët vunë re elemente të dyshimta dhe vendosën të kryenin një kontroll më të imtësishëm të automjetit.
Droga u zbulua e fshehur në një strukturë metalike të kamionit, e përdorur për stabilizimin e ngarkesës.
Pas zbulimit të kokainës, shoferi shqiptar u arrestua dhe iu dorëzua autoriteteve kundër trafikut të narkotikëve në Marsejë.
Gjatë marrjes në pyetje, 50-vjeçari ka mohuar përfshirjen në trafik droge, duke pretenduar se nuk kishte dijeni për lëndën narkotike dhe se ajo mund të ishte vendosur në kamion nga persona të tjerë.
Sipas raportimeve franceze, ai nuk kishte precedentë penalë dhe nuk rezultonte më parë i njohur për drejtësinë franceze.
Shqiptari pritet të dalë më 24 nëntor përpara Gjykatës së Tarasconit, ku do të përballet me akuzat për mbajtje, transport dhe importim të lëndëve narkotike.
Hetimet vijojnë për të zbuluar origjinën e kokainës dhe personat që qëndrojnë pas organizimit të transportit.

