Parkimi në Tiranë kthehet në luks, 15 metra katrorë garazh shitet për 110 mijë euro
Parkimi në Tiranë po kthehet gjithnjë e më shumë në një luks, me çmime që kanë arritur nivele të pazakonta. Sigurimi i një garazhi privat në zonat më të kërkuara të kryeqytetit kërkon tashmë një investim që kalon edhe vlerën e një apartamenti në disa zona të tjera të qytetit.
Rasti më i fundit vjen nga zona e Bllokut, ku një garazh me sipërfaqe vetëm 15 metra katrorë është nxjerrë në shitje për 110 mijë euro. Me këtë çmim, një metër katror parkimi kushton rreth 7,300 euro, një vlerë që tejkalon edhe çmimet e shumë apartamenteve në kryeqytet.
Por shtrenjtimi nuk kufizohet vetëm në zonën e Bllokut. Tregu i garazheve në Tiranë ka njohur një rritje të fortë gjatë viteve të fundit. Pesë apo gjashtë vite më parë, një garazh në Komunën e Parisit mund të blihej për 10-15 mijë euro, ndërsa në zonat qendrore çmimet arrinin në maksimumin 30-35 mijë euro.
Sot, situata është krejt ndryshe. Në Komunën e Parisit, një garazh kushton të paktën 40 mijë euro, ndërsa çmimet mesatare luhaten nga 50 deri në 60 mijë euro, në varësi të pozicionit dhe karakteristikave të pronës. Në periferi, vendet e parkimit mund të gjenden duke nisur nga 20 mijë euro, por kryesisht bëhet fjalë për hapësira të hapura dhe jo garazhe të mbyllura.
Edhe tregu i qirave ka reflektuar këtë tendencë. Në Komunën e Parisit, një vend parkimi jepet me qira për 12-20 mijë lekë në muaj, nga vetëm 4-5 mijë lekë që kushtonte disa vite më parë. Në Bllok, tarifa mujore kalon 20 mijë lekë.
Një ndër faktorët që ka ndikuar në këtë shtrenjtim është edhe vendosja e tarifave për parkimin në rrugët publike. Pagesa prej 100 lekësh për orë ka shtuar presionin mbi kërkesën për hapësira private, duke ndikuar edhe në rritjen e çmimeve të tyre.
Megjithatë, presioni mbi tregun pritet të vijojë të shtohet. Numri i automjeteve në kryeqytet po rritet, ndërsa hapësirat e disponueshme për parkim po pakësohen, edhe për shkak të ndërtimeve të reja që zënë sipërfaqe të përdorura më parë për këtë qëllim.
Në fund të tetorit 2026, në Tiranë rezultonin të regjistruara rreth 390 mijë automjete, afërsisht një e treta e totalit të mjeteve në të gjithë vendin. Në të njëjtën kohë, disa hapësira publike parkimi janë mbyllur ose pritet të zëvendësohen nga projekte të reja ndërtimi.
Në këto kushte, gjetja e një vendi për të parkuar makinën po bëhet gjithnjë e më e vështirë dhe më e kushtueshme. Ajo që dikur konsiderohej një nevojë e zakonshme për çdo drejtues automjeti, sot po shndërrohet në një aset të shtrenjtë dhe në një tjetër barrë për buxhetin e familjeve shqiptare.

