30 shqiptarë në burg në Britani brenda një muaji, mbi 126 vite dënime për drogë
Të paktën 30 shtetas shqiptarë janë dënuar me burg në Mbretërinë e Bashkuar vetëm gjatë muajit shtator, në kuadër të rasteve që lidhen me veprat penale të drogës.
Sipas të dhënave të publikuara në Britani, këta persona kanë marrë së bashku më shumë se 126 vite burg për vepra që lidhen me drogat e kategorisë A.
Në të njëjtën periudhë, 24 shtetas të tjerë shqiptarë janë paraqitur para gjykatave në Londër, të akuzuar për posedim të lëndëve narkotike me qëllim shpërndarjen.
Raportimi britanik ngre shqetësimin për përfshirjen e shtetasve shqiptarë në tregun e shpërndarjes së kokainës në Britani, veçanërisht përmes rrjeteve që përdorin platformat online dhe rrjetet sociale për rekrutimin e personave që merren me shpërndarjen e drogës.
Sipas hetimeve dhe burimeve të cituara në raportim, rekrutimi i shpërndarësve po bëhet edhe përmes TikTok-ut dhe platformave të tjera sociale. Në disa raste janë publikuar oferta për persona që kërkohen për shpërndarje droge në qytete të ndryshme britanike.
Një nga rastet e përmendura lidhet me një ofertë pune në Manchester, ku një shpërndarësi i ri i drogës i premtohej pagesë prej rreth 2,100 paundësh në javë, përveç transportit, karburantit dhe akomodimit.
Autoritetet britanike dhe ekspertët e sigurisë kanë ngritur prej kohësh shqetësimin për mënyrën se si grupet kriminale përdorin rrjetet sociale për të rekrutuar persona të rinj në tregun e kokainës.
Raportimi thekson gjithashtu se një pjesë e të dënuarve shqiptarë, pasi përfundojnë dënimin ose dëbohen nga Britania, mund të zëvendësohen nga persona të tjerë të rekrutuar nga rrjetet kriminale.
Në total, vetëm gjatë muajit shtator, dënimet ndaj 30 shtetasve shqiptarë kanë arritur në më shumë se një shekull burgim të kombinuar.
Autoritetet britanike vijojnë hetimet ndaj rrjeteve të dyshuara për importimin, shpërndarjen dhe shitjen e kokainës në qytete të ndryshme të vendit.

