12 kg cannabis xhelatinoze! Flavio Ismailaj i ikën policisë, braktis makinën në Sauk dhe futet në pyll – arrestohet Mariglen Vata.
Tiranë – Një operacion antidrogë i zhvilluar në orët e para të mëngjesit ka çuar në sekuestrimin e 12.1 kilogramëve Cannabis Sativa në trajtë xhelatinoze, e cila dyshohet se ishte përgatitur për t’u shitur në vendin tonë.
Operacioni, i koduar “Risia”, ka vënë në kërkim 22-vjeçarin Flavio Ismailaj, ndërsa bashkëpunëtori i tij, Mariglen Vata, është arrestuar në flagrancë.
Sipas Policisë, në orët e para të mëngjesit të 19 nëntorit, shërbimet i kanë bërë shenjë ndalimi automjetit që drejtohej nga Flavio Ismailaj në autostradën “Tiranë-Elbasan”. I riu nuk i është bindur urdhrit të policisë, ka vijuar lëvizjen me shpejtësi dhe më pas ka braktisur automjetin në zonën e Saukut, duke u larguar në këmbë.
Gjatë ndjekjes, efektivët kanë zbuluar se lëvizjet e automjetit që transportonte lëndën narkotike monitoroheshin nga një tjetër automjet, me drejtues Mariglen Vata. Ky i fundit u kap dhe u vu në pranga.
Kontrolli i automjetit të braktisur nga Flavio Ismailaj zbuloi 12.1 kilogramë Cannabis Sativa në trajtë xhelatinoze. Ndërkohë, gjatë kontrollit në banesën e Mariglen Vatës u gjet edhe një sasi e dyshuar kokaine.
Në kuadër të operacionit u sekuestruan lëndët narkotike, dy automjete dhe tre telefona celularë.
Flavio Ismailaj vijon të jetë në kërkim, ndërsa hetimet, nën drejtimin e Prokurorisë, po vijojnë për të zbardhur të gjithë skemën dhe për të identifikuar persona të tjerë që mund të jenë përfshirë në këtë aktivitet.
Materialet procedurale i janë referuar Prokurorisë për veprime të mëtejshme.

