Për t’i shpëtuar aktivitetit kriminal dhe trafikut të drogës, Olsi Meta të cilit iu sekuestruan 26 mln euro pasuri ka përdorur 5 identitete të ndryshme.
Deri në vitin 2009 ai ka mbajtur emrin e lindjes, Olsi Meta. Në janar të vitit 2012, ndryshon dhe mbiemrin, nga Meta në Koni, duke marrë mbiemrin e nënës. Por në maj të këtij viti, ka ndryshuar emrin, nga Olsi në Kristian.
Sipas dosjes ai rezulton të ketë përdorur dhe dy identitete të tjera, Zdanaivicius Ramunas (lindur më 28.07.1980) dhe Kelys Zydrunas (lindur më 29.04.1987). Por, nga një kërkim në internet rezulton se emri i fundit, Kelys Zydrunas i përkon një basketbollisti të njohur lituanez.
Nga kërkimi rezulton se Olsi Meta i ka vjedhur jo vetëm emrin, por përkon edhe data e datëlindjes 29 prill 1987, e cila është përdorur nga ai në mjetet false të identifikimit që i përdorte për t’i shpëtuar autoriteteve të huaja.
Emri tjetër, i cili është përdorur nga Olsi Meta nuk rezulton i ndonjë personazhi të njohur. Por, emri Zdanavičius Ramunas, që është përdorur nga Meta, rezulton në rrjete sociale. Meta e ka përdorur emrin për të prodhuar mjet identifikimi fals.
Hetimi pasuror për 45-vjeçarin ka nisur në bazë të ligjit antimafia, dhe ka qenë Policia e Shtetit ajo që ka referuar në prokurorinë e Tiranës, që në muajin prill të vitit 2025. Organi i akuzës ngre dyshime se asetet e shumta që Koni dhe e ëma e tij zotëronin nuk justifikoheshin nga të ardhurat e tyre.
Dyshimet janë shtuar më shumë edhe në lidhje me disa trasaksione në fushën e shitblerjes së pasurive te paluajtshme dhe te luajtshme, të cilat sipas organit të akuzës janë cilësuar si anormale. Për të faktuar këtë prokuroria ka sjellë në gjykatë si shembull kontratën e blerjes së një vile trekatëshe me pishinë në zonën e Farkës, në pronësi të 45 vjecarit në një nga komplekset me luksose ne kryeqytet, ”Rolling Hills 2”.
Nga hetimi ka rezultuar se fillimisht për blerjen e saj është rënë dakord në vlerën 808.000 mijë eurove por më pas kjo kontratë është anuluar dhe çuditërisht është bërë një kontratë e re, ku palët kanë rënë dakord për blerjen e së njëjtës pasuri në vlerën e 300 mijë eurove.
Ndërkohë nuk ka mbetur pas edhe nëna e tij Fitnete Meta. Nga hetimet e prokurorisë ka rezultuar se kjo shtetase ka shitur dhe blerë disa pasuri të paluajtshme, përmes transaksioneve me pikëpyetje.
