Lehtësohen procedurat për pajisjen me titull pronësie
Qeveria ka miratuar ndryshime të reja në vendimin nr. 827, datë 30.09.2020, si dhe në VKM-në nr. 5, datë 11.01.2023, me qëllim përshpejtimin dhe thjeshtimin e procedurave për pajisjen me dokument pronësie të ndërtimeve pa titull, trojeve funksionale dhe oborreve në përdorim.
Një nga risitë kryesore është kalimi nga trajtimi individual i aplikimeve në një proces të organizuar sipas blloqeve kadastrale. Përmes një planveprimi të miratuar nga Drejtoria Vendore e Agjencisë Shtetërore të Kadastrës (ASHK), verifikimet në terren do të kryhen njëkohësisht për territore më të gjera, duke përfshirë një numër më të madh kërkesash.
Sipas ndryshimeve të miratuara, kjo qasje synon të shkurtojë kohën e procedurave administrative dhe të mundësojë përfundimin e tyre brenda afateve të përcaktuara nga ligji nr. 20/2020.
Përjashtim nga tarifat për procedurat e nisura nga ASHK-ja
Lehtësime parashikohen edhe në aspektin financiar për qytetarët. Për objektet me funksion banimi, nuk do të aplikohet tarifa standarde e shërbimit kur procedura nis kryesisht nga ASHK-ja.
Përjashtimi përfshin si ndërtimet pa leje që janë pjesë e procesit të legalizimit, për të cilat tarifa është 3 mijë lekë, ashtu edhe objektet pa titull pronësie, trojet funksionale dhe oborret në përdorim, për të cilat tarifa është 10 mijë lekë.
Deri në 300 metra katrorë për trojet e ndërtimeve para vitit 1991
Një tjetër element i rëndësishëm i ndryshimeve është saktësimi i sipërfaqes së parcelës që mund të kalojë në pronësi për ndërtimet e ngritura përpara vitit 1991. Sipërfaqja përcaktohet deri në 300 metra katrorë, në raport me nevojat reale të ndërtimit dhe parashikimet ligjore.
Ky përcaktim synon të qartësojë marrëdhënien juridike mes truallit dhe ndërtesës, duke mundësuar regjistrimin e pasurive në regjistrin kadastral dhe përfshirjen e tyre në qarkullimin civil.
Ndryshimet parashikojnë gjithashtu që, kur procedura nis me iniciativën e ASHK-së, gjatë verifikimit në terren qytetarëve t’u vihet në dispozicion formulari i deklarimit të të dhënave për kalimin e pronësisë.
Me këto ndërhyrje, synohet të lehtësohet pajisja me dokumentacion pronësie për qytetarët që posedojnë ndërtime pa titull, troje funksionale dhe oborre në përdorim, duke reduktuar kostot dhe kohën e pritjes për përfundimin e procedurave.
Vendimet e reja hyjnë në fuqi pas botimit në Fletoren Zyrtare.

