Andi Bajrami, “truri” i kullës së drejtimit në ASHK? Dyshime për rolin e juristit në kohën e Dallandyshe Bicit dhe Ervin Bixhës
Juristi i Agjencisë Shtetërore të Kadastrës, Andi Bajrami, i cili tashmë është dërguar për gjykim nga Prokuroria e Tiranës për akuzën e shpërdorimit të detyrës në lidhje me një pasuri prej 3,250 m² në Selitë, rikthehet në qendër të vëmendjes për një tjetër aspekt të aktivitetit të tij në ASHK.
Përtej dosjes penale që lidhet me fshirjen e shënimit kufizues në favor të shoqërisë “Triumph Company” dhe krijimin e mundësisë për lidhjen e një kontrate të re me “Al Development” sh.p.k., emri i Bajramit lidhet edhe me dyshime për rolin që mund të ketë pasur në strukturën e brendshme të institucionit gjatë periudhës kur ASHK drejtohej nga Dallandyshe Bici dhe më pas nga Ervin Bixha.
Në atë periudhë, në ambientet e institucionit përmendej edhe një strukturë informale e njohur si “kulla e drejtimit”, ku, sipas dyshimeve që kërkojnë verifikim, kalonin apo orientoheshin aplikimet dhe praktikat e ndryshme përpara trajtimit të tyre.

