1.5 MILION TONË MBETJE INDUSTRIALE NË ELBASAN
KLSH: 1.5 milion tonë mbetje me metale të rënda, pa plan për zgjidhjen e problemit
Një nga gjetjet më të rënda të raportit lidhet me trashëgiminë industriale të Elbasanit.
Sipas KLSH-së, në territorin e ish-Metalurgjikut ndodhen të depozituara rreth 1.5 milion tonë mbetje industriale, përfshirë mbetje që lidhen me materiale si ferrokromi dhe ferronikeli. Raporti i trajton ato si mbetje me rrezik të vazhdueshëm për komunitetin dhe mjedisin.
Problemi, sipas auditimit, nuk është vetëm sasia e mbetjeve. Institucionet përgjegjëse nuk kanë hartuar një plan-veprim sektorial dhe institucional për heqjen dhe trajtimin e tyre.
KLSH thekson se ndotja industriale e trashëguar lidhet me depozitimin e metaleve të rënda në tokë dhe me ndotjen e tokës dhe burimeve ujore. Për këtë problem, sipas raportit, ka objektiva strategjikë, por ka munguar një plan konkret veprimi për zgjidhjen e situatës. raporti elb kruje.pdf
Raporti kërkon që institucionet qendrore, Bashkia Elbasan dhe Këshilli i Qarkut të marrin masa për transferimin e këtyre mbetjeve si mbetje të rrezikshme dhe për trajtimin e tyre në përputhje me kërkesat teknike e mjedisore.
Pra, bëhet fjalë për një problem të trashëguar industrial me përmasa shumë të mëdha, i cili sipas auditimit vijon të mbetet pa një zgjidhje konkrete.
