SPAK ka bërë publike akuzat ndaj të pandehurit Elson Reçi (alias Elson Kaçorri), i cili dyshohet si krijues, organizues dhe drejtues i një grupi të strukturuar kriminal. Sipas hetimeve, Reçi ka vepruar në bashkëpunim me të pandehurit Fatmir Troplini dhe Klodian Shahini, si dhe me persona të tjerë të paidentifikuar, gjatë periudhës qershor–shtator 2020.
Prokuroria e Posaçme pretendon se grupi kriminal ka siguruar kushte dhe mjete materiale për të realizuar vrasjen e shtetasit Preng Gjini (alias Preng Badanance). Ngjarja kulmoi më 15 shtator 2020, në zonën e njohur si ura e Nishërak-ut, ku në automjetin tip Mercedes Benz me targa AA 903 YG, ku udhëtonte Gjini, shpërtheu një sasi lënde eksplozive.
Si pasojë e shpërthimit, Preng Gjini mbeti i plagosur rëndë, ndërsa dy qytetarë që ndodheshin rastësisht pranë vendngjarjes pësuan dëmtime të lehta. Sipas SPAK, ngjarja u realizua por mbeti në tentativë, pasi objektivi kryesor i vrasjes nuk humbi jetën.
Çështja është pjesë e proçedimit penal nr. 59/1 të vitit 2022 dhe po hetohet në kuadër të goditjes së grupeve të strukturuara kriminale të përfshira në atentate të porositura dhe konflikte të gjata mes palëve.
