Gjykata e Apelit në Amiens ka refuzuar lirimin e Ermal Beqirit, ndërsa prokuroria franceze është shprehur në favor të ekstradimit të tij drejt Shqipërisë. Gazeta franceze Le Courrier Picard zbulon debatet në sallën e gjyqit, ku biznesmeni shqiptar e ka cilësuar procesin politik dhe avokati i tij ka kundërshtuar garancitë e dërguara nga autoritetet shqiptare.
Biznesmeni Ermal Beqiri do të vazhdojë të qëndrojë në burg në Francë, pasi Gjykata e Apelit në Amiens ka rrëzuar kërkesën e tij për lirim nga paraburgimi.
Në një raportim të publikuar më 23 tetor 2026, gazetari Gautier Lecardonnel i Le Courrier Picard sjell hollësi nga seanca gjyqësore, gjatë së cilës është shqyrtuar edhe themeli i kërkesës së Shqipërisë për ekstradimin e biznesmenit.
Sipas gazetës franceze, SPAK dyshon se Beqiri është një nga organizatorët e një rrjeti që ka siguruar kontrata publike në sektorin e teknologjisë së informacionit përmes manipulimit të konkurrencës dhe intimidimit. Hetimi përfshin 19 procedura prokurimi, me vlerë të përllogaritur prej 59 milionë eurosh.
Shqipëria dërgon tri dokumente, avokati i Beqirit i quan joserioze
Në muajin gusht, Dhoma e Hetimit në Amiens kishte kërkuar informacione shtesë përpara se të vendoste mbi ekstradimin.
Autoritetet shqiptare kanë dërguar tri dokumente: një shkresë nga ministri i Drejtësisë, një tjetër nga drejtuesi i SPAK lidhur me garancitë juridike dhe një dokument nga Drejtoria e Përgjithshme e Burgjeve.
Por avokati i Beqirit, Nicolas Paganelli, ka kundërshtuar si formën, ashtu edhe përmbajtjen e tyre.
“Janë drafte, nuk janë punë serioze. Ju nuk jeni shërbimi i asistencës pas shitjes për garanci diplomatike të paplota”, është shprehur ai, sipas Le Courrier Picard.
Beqiri: Nëse kam korruptuar dikë, ai është shteti
Në sallën e gjyqit, biznesmeni shqiptar ka vënë në dyshim drejtësinë e vendit të tij, duke pretenduar se çështja kundër tij ka karakter politik.
“Nëse kam korruptuar dikë, ai është shteti. Por nga ajo anë, askush nuk është në burg. Gjithsesi, këtu ka një problem. Kjo çështje është thjesht politike”, ka deklaruar Beqiri, sipas gazetës franceze.
Nga ana tjetër, Prokuroria e Përgjithshme në Amiens është shprehur në favor të ekstradimit.
“Ju kërkohet të mbani një qëndrim për sistemin gjyqësor shqiptar, por ky nuk është roli i Dhomës së Hetimit”, ka argumentuar përfaqësuesja e prokurorisë.
Gazeta franceze citon gjithashtu prokurorinë të ketë folur për një “spastrim të madh të organizuar” në Shqipëri, në kontekstin e debatit gjyqësor mbi ekstradimin.
Ermal Beqiri, i cili zotëron një kështjellë në Berneuil-en-Bray, në departamentin francez Oise, u arrestua në fund të korrikut, pasi kishte fluturuar me avionin e tij mbi centralin bërthamor të Penly.
Për momentin, drejtësia franceze ka vendosur vetëm që ai të mos lirohet nga paraburgimi. Vendimi për ekstradimin drejt Shqipërisë mbetet ende për t’u marrë.
Burimi: Le Courrier Picard, Gautier Lecardonnel, 23 tetor 2026.
