Kryeinspektori i Përgjithshëm, Dashnor Sula, ka treguar se një zyrtar i lartë i Partisë Socialiste i kishte kërkuar të emëronte drejtor të birin. Gjatë një interviste në Top News, ai bëri publik edhe mesazhin zanor që kishte marrë nga kryeministri Edi Rama, pasi e kishte vënë në dijeni për këtë ndërhyrje.
“Jo po djali i këtij, jo po djali i atij. Ça janë këto muhabetet. Mos i dëgjo fare”, dëgjohet të thotë Rama në mesazhin drejtuar Sulës.
Sula e paraqiti këtë përgjigje si dëshmi të qëndrimit të kryeministrit kundër punësimeve nepotike, duke u shprehur se ai është treguar gjithmonë parimor për këtë çështje. Për të na bindur, kishte sjellë edhe provën: vetë Ramën që thoshte se nuk duhen dëgjuar ndërhyrjet.
Megjithatë, rrëfimi i tij lë një pyetje: përse duhej pyetur kryeministri për një kërkesë punësimi nga një drejtues partie?
Duke kërkuar të tregonte sa fort e kundërshton Rama nepotizmin, Sula e la të paqartë përse nuk e kishte mbyllur vetë këtë muhabet. Sepse nga mënyra si e rrëfeu, krijohet përshtypja se pengesa për djalin e zyrtarit ishte përgjigjja e kryeministrit.
Në këtë histori, meritokracia duket se e kishte përgjigjen. Për siguri, u pyet edhe Rama.
