Prokuroria e Posaçme kundër Korrupsionit dhe Krimit të Organizuar njoftoi të shtunën më 6 dhjetor përfundimin e hetimeve dhe dërgimin për gjykim të çështjes penale ndaj 27 anëtarëve të krimit të organizuar shqiptar, pjesë e disa grupeve kriminale të goditura gjatë një operacioni në maj të vitit të kaluar kur u lëshuan gjithsej 50 urdhër-arreste.
Hetimi i SPAK kundër këtyre 7 organizatave kriminale, i bazuar tek të dhënat e aplikacionit të koduara Sky-ECC, zbardhi 18 episode kriminale që lidhen me vrasje, ndihmë për kalim të paligjshëm të kufirit e trafik droge, si dhe bëri të dukshme e faktoi lidhjet mes krimit e politikës në Shqipëri. Të dhënat e bëra publike nga ky hetim i SPAK treguan se tre deputetë të Partisë Socialiste, nga të cilët dy nga legjislaturat e shkuara dhe një nga legjislatura aktuale, kishin familjarë ose janë përfshirë në mënyrë të drejtpërdrejtë në aktivitete kriminale, si pjesë e strukturave të krimit të organizuar. Po ashtu, u zbuluan dhe përfshirje të punonjësve të policisë në këto organizata.
Atentatet mes grupeve kriminale
Në njoftimin e SPAK të shpërndarë të shtunën, evidentohen episodet e atentateve e planeve të vrasjeve mes të pandehurve, që tregojnë për një luftë të ashpër e të vadueshme mes grupeve rivale. Po ashtu, konstatohen dhe veprimtaritë e tjera të paligjshme në trafikimin e narkotikëve e qenieve njerëzore.
Ish-deputeti i Partisë Socialiste, Arben Ndoka dhe i pandehuri Arian Tuku akuzohen se në rolin e krijuesve, organizuesve dhe drejtuesve të grupit të strukturuar kriminal, në bashkëpunim me anëtarët e tjerë, Ervis Martinaj, Samuel Ndoka, Jozi Kraja, Aldo Avdyli alias Elidon Avdyli, Marklen Haka alias Marklen Aliu, si dhe me të pandehur të tjerë të dërguar më parë për gjykim e persona të tjerë të paidentifikuar, gjatë vitit 2020 kanë siguruar kushte dhe mjete materiale për të kryer vrasjen e shtetasve, Durim Bami dhe Valter Bami.
të pandehurit Noka dhe Tuku akuzohen se në bashkëpunim me Samuel Ndokën, Vinçens Tukun, si dhe me shtetas të tjerë të paidentifikuar, kanë planifikuar vrasjen shtetasit Aleks Ndrekaalias Aleksandër Deda në dhjetor të vitit 2020, që ka mbetur në tentativë. Ndreka mori plagë të lehta, pasi u qëllua më armë zjarri nga një automjet.
Ndoka dhe Tuku akuzohen po ashtu se kanë ndihmuar të pandehurin Aldo Avdyli alias Elidon Avdyli për kalimin e paligjshëm në Mal të Zi.
Një tjetër grup i strukturuar kriminal i krijuar nga i pandehuri, Tori Xhecuka alias Hektor Xhecuka dhe i financuar nga i pandehuri Ervis Martinaj, në përbërje të të cilit ishin dhe të pandehurit Florenc Kelmendi alias Florenc Toçi dhe Marklen Haka alias Marklen Aliu, si dhe të pandehur të tjerë të dërguar më parë për gjykim, akuzohen se kanë organizuar prej qershorit 2020 vrasjen e Durim Bami. Vrasja është planifikuar për shkak të konflikteve që Ervis Martinaj dhe Tori Xhecuka kishin me Bamin. më 4 nëntor të vitit 2020, ata kanë tentuar të vrasin me armë zjarri pa leje Durim Bamin dhe Ervin Kodrën, në vendin e quajtur Ura e Tapizës të Fushë Krujës.
Xhecuka në bashkëpunim me të pandehurit Florenc Kelmendi alias Florenc Toçi, Ardit Gjokrosa, si dhe me të pandehur të tjerë të dërguar më parë për gjykim, gjatë periudhës maj-korrik 2020 kanë siguruar kushte dhe mjete materiale për të kryer vrasjen e Hamza Terziut. Sipas SPAK, i pandehuri Tori Xhecuka ka tentuar të vrasë Hamza Terziun më datë 18 maj të vitit 2020 duke shtënë me automatik 26 herë në drejtim të banesës së tij, ku gjendeshin dhe katër familjarë të tjerë.
Hetimet kanë zbuluar edhe atentatet e kundërshtarëve të tyre. I pandehuri Durim Bami në cilësinë e krijuesit dhe drejtuesit të grupit kriminal, akuzohet se në bashkëpunim me të pandehurin Endrit Dokle, të pandehur të tjerë të dërguar më parë për gjykim, e persona të paidentifikuar ende, gjatë muajit janar 2021 kanë siguruar kushte dhe mjete materiale për të kryer vrasjen e shtetasit Arben Ndoka.
Bami në bashkëpunim me Doklen dhe Marklen Haka alias Marklen Aliu, si dhe me persona të tjerë të paidentifikuar, në shkurt të 2021-it kanë siguruar kushte e mjete për vrasjen e Tori Xhecukas dhe Erigers Mihasit.
Ervis Martinaj akuzohet se në bashkëpunim me të pandehurit Denis Meta, Kristos Teta e persona të tjerë të dërguar për gjykim e të paidentifikuar, në vitin 2020 kanë siguruar kushte dhe mjete materiale për të kryer vrasjen e Leonard Dukës, Elvis Gacës dhe Altin Gegës.
Po ashtu, Martinaj akuzohet se gjatë viteve 2020 dhe 2021 ka organizuar sigurimin e kushteve dhe mjete për vrasjen e shtetasve, Fatmir Hyseni dhe Armando Hyseni.
Nga ana tjetër, edhe Leonard Duka në bashkëpunim me Fatmir Hysenin, Erlis Dukën dhe Altin Gegën, si dhe persona të tjerë, gjatë muajve qershor-korrik 2020 kanë siguruar kushte dhe mjete materiale për të kryer vrasjen e Ervis Martinajt dhe Erigers Mihasit.
I pandehuri Elson Reçi alias Elson Kaçorri, në bashkëpunim me të pandehurit Fatmir Troplini dhe Klodian Shahini, si dhe persona të tjerë, gjatë periudhës qershor-shtator 2020 kanë siguruar kushte dhe mjete për vrasjen e Preng Gjini alias Preng Badanance. Qëllimin e kanë realizuar më datë 15 shtator 2020, duke shpërthyer ekspolizv në makinën e Gjinit, i cili mbeti i plagosur rëndë. Në këtë atentat u plagosën lehtë dhe dy shtetas të tjerë që ndodheshin rastësisht në vendngjarje.
Kultivim e trafikim lëndësh narkotike
Disa prej të pandehurve akuzohen dhe për financimin e kultivimit dhe trafikimit të lëndëve narkotike. I pandehuri Durim Bami akuzohet se në vitet 2019-2020, ka finnacuar dhe është kujdesur për kultivimin e bimëve narkotike në fshatin Nikël të Fushë-Krujës, si dhe në zonën e Njësisë Administrative Bubq, të Bashkisë Krujë. Për mundësimin e kësaj veprimtarie të paligjshme ai është ndihmuar dhe nga punonjës të Policisë së Shtetit, mes tyre dhe i pandehuri Altin Morina.
Ndërkohë, në zonën e Qarkut të Lezhës, gjatë muajve qershor-shtator 2020 ka ushtruar veprimtari të kundraligjshme në fushën e kultivimit të bimëve narkotike të llojit kanabis sativa, një grup i i drejtuar nga Elson Reçi, i cili është ndihmuar nga shefi i Sektorit të Luftës Kundër Narkotikëve në Drejtorinë e Policisë Lezhë, Klodian Shahini, duke i dhënë informacione e luajtur rol në shmangien e kontrolleve policore në zonat ku kultivohej bima narkotike.
Po këtë vit, në zonën e Qarkut të Lezhës, si dhe në Krujë, ka kultivuar bimë narkotike dhe një grup tjetër, drejtuesi i të cilit ka mbetur i paidentifikuar. Në këtë veprimtari është përfshirë sërish zyrtari i policisë, Klodian Shahini, si dhe vetë Drejtori i Drejtorisë Vendorë të Policisë Lezhë, Henerigert Mitri.
“Ata, duke përdorur detyrën kanë favorizuar kultivimin e kanabisit dhe i kanë dhënë informacione të brendshme policore drejtuesit të grupit si dhe kanë ndihmuar në shmangien e kontrolleve policore në parcelat ku kultivohej lënda narkotike”, citohet në njoftim.
ndërkohë, Henerigert Mitri, në cilësinë e Drejtorit Policisë në Drejtorinë Vendore të Policisë Lezhë, gjatë periudhës kohore janar-shtator 2020, duke komunikuar me përdorues të ndryshëm të aplikacionit Scy ECC, akuzohet se me dashje nuk ka ushtruar detyrat e tij funksionale, duke lejuar ushtrimin e lojërave të fatit në kundërshtim me ligjin.
Të pandehurit Arian Tuku, Kasandër Noga dhe Edson Jozëik alias Edson Pjetri, alias Edmir Pjetri, gjatë muajve qershor-nëntor të vitit 2020, kanë drejtuar e financuar organizuar, drejtuar dhe financuar një grup të strukturuar kriminal, të destinuar për trafikimin e bimëve narkotike të llojit kanabis sativa, me destinacion vendet e Bashkimit Europian.