Dy aksidente të rënda rrugore janë regjistruar gjatë ditës së sotme në akset rrugore Thumanë–Fushë-Krujë dhe në Rrugën e Arbrit, duke shkaktuar tre viktima dhe pesë persona të plagosur.
Ngjarja e parë është shënuar në autostradën Thumanë–Fushë-Krujë, në afërsi të Luzit, ku një 65-vjeçar nga Mirdita, i identifikuar si Paulin Filopati, ka humbur jetën pasi është përplasur nga një automjet tip “Mercedes”.
Sipas informacioneve paraprake, Filopati ishte duke kaluar rrugën në momentin kur është goditur nga automjeti, i cili drejtohej nga Floxhen Bardhi. Përplasja ka qenë fatale për 65-vjeçarin, i cili ka ndërruar jetë në vendngjarje.
Në momentin e aksidentit, pranë tij ndodhej edhe bashkëshortja, e cila fatmirësisht nuk është përfshirë në përplasjen fatale.
Ndërkohë, një tjetër aksident i rëndë është regjistruar paraditen e sotme në zonën e Shkallës së Tujanit, në Rrugën e Arbrit, në Dibër. Dy automjete janë përplasur me njëri-tjetrin, duke shkaktuar dy viktima dhe pesë persona të plagosur.
Si pasojë e përplasjes kanë humbur jetën Bledian Osmani, 42 vjeç, drejtuesi i njërit prej automjeteve, si dhe Maltina Ferati, e cila udhëtonte si pasagjere në automjetin tjetër.
Pesë personat e tjerë të përfshirë në aksident kanë mbetur të plagosur dhe janë transportuar drejt spitalit për të marrë ndihmën e nevojshme mjekësore.
Të dyja ngjarjet kanë tronditur zonat ku kanë ndodhur, ndërsa aksidentet rikthejnë vëmendjen te siguria rrugore dhe pasojat tragjike të përplasjeve në akset e vendit.
Rrethanat dhe shkaqet e plota të të dy aksidenteve pritet të sqarohen nga hetimet e autoriteteve përkatëse.
