Pas atentatit mafioz në aeroportin e Rinasit, Policia e Tiranës i ka kërkuar zyrtarisht informacion autoriteteve spanjolle informacion për të zbuluar lëvizjet e Gilmando Danit, që mbeti i vrarë, dhe mikut të tij Muçi Shaljani allias Sheqeri. Autoritetet e vendit tonë kërkojnë të dhëna mbi qëndrimin e tyre 4 ditor në Barcelonë, por deri më tani, siç sqarojnë burimetv autoritetet e huaja ende nuk kanë kthyer përgjigje.
Blutë kanë vijuar kontrollet në zonë të ndryshme pas atentatit, si në Tiranë, Kamëz, Nikël e Fushë-Krujë. Kontrolle u ushtruan në godina të braktisura dhe te persona të skeduar më herët, por deri më tani nuk është gjetur asgjë me vlerë për hetimin. Madje, 15 persona janë shoqëruar në Polici, kryesisht familjarë të viktimës dhe të plagosurit.
Katër autorët që morën pjesë në atentat, 3 qitës dhe njëri shofer, kanë derdhur breshëri nga 3 kallashë dhe një pistoletë. Të paktën 80 gëzhoja janë gjetur në vendin e ngjarjes, ndërsa krahu i djathtë i Emiljano Shullazit, Gilmando Dani ka marrë 20 plumba në trup, duke vdekur në vend. Ndërkohë miku i tij, me të cilin kishte udhëtuar në Barcelonë, ka marrë 10 plumba, njërin prej të cilëve në kokë. Ai ndodhet prej tre ditësh në gjendje të rëndë shëndetësore, i intubuar në Spitalin e Traumës.
Grupi hetimor nuk ka ende asnjë gjurmë nga autorët, të cilët mjetin e djegën në fshatin Halil në Fushë-Krujë dhe nga aty janë zhdukur. Burime bëjnë me dije se edhe makina “Toyota” e përdorur nga autorët në krim është vjedhur po ashtu në Greqi dy vite më parë, më datë 22 tetor 2023. Edhe targat po ashtu ishin vjedhur në shtetin helen në vitin 2024.
Autorët i pritën për të paktën 10 minuta në rrethin e Rinasit Danin dhe mikun e tij. Sapo u afruan 3 qitësit zbritën në tokë dhe qëlluan me breshëri kallashi, ndërsa njëri prej tyre ju afrua makinës duke qëlluar me pistoletë që të sigurohej që Dani të vdiste. I gjithë sulmi agresiv, nga momenti i pikasjes së Benzit e deri në largimin e Toyotas, ndodh për 80 sekonda.
Grupi i vrasësve gjakftohtë ishte nisur nga Nikla me makinën “Toyota Yaris” përmes rrugës së re te Ura e Tubit, e cila lidh fshatrat e Fushë Krujës me Rinasin. E njëjta u përdor edhe në kthim. Por një detaj ngre dyshime për hetuesit e Policisë së Tiranës. Në kohën që makina ka kaluar drejt aeroportit, por dhe në arratisje, zona pranë itinerarit të rrugës ka qenë pa energji elektrike. Hetuesit dyshojnë që autorët të kenë gisht, pasi kamerat e sigurisë, kishin dalë jashtë loje, pa mundur të filmojnë lëvizjen e makinës që më vonë u gjet e djegur, në një rrugicë të ngushtë në fshatin Halil.