Vrasja e 39-vjeçarit shqiptar Luka Beqiraj në Spanjë ka rikthyer në vëmendje emrin e tij në dosjet e hetimeve për trafikun ndërkombëtar të drogës dhe armëve. I njohur në qarqet kriminale, sipas raportimeve të mediave spanjolle, me nofkën “Kriols”, Beqiraj ishte arrestuar në vitin 2019 në kuadër të një operacioni të përbashkët të autoriteteve shqiptare dhe italiane, që goditi një rrjet të dyshuar italo-shqiptar të narkotrafikut.
39-vjeçari, i lindur në Vlorë në vitin 1987, u vra të martën, më 10 nëntor, në një kompleks sportiv në zonën e Playa Flamenca, në Orihuela Costa, provinca e Alicante-s. Sipas raportimeve të medias spanjolle “El Español”, autori e ka qëlluar me armë zjarri dhe është larguar menjëherë nga vendi i ngjarjes.
Hetimet për identifikimin e autorit dhe zbardhjen e motiveve po zhvillohen nga Guardia Civil. Një prej pistave që po shqyrtohet është ajo e një larjeje të mundshme hesapesh, e lidhur me konflikte apo borxhe të dyshuara në mjediset kriminale. Megjithatë, autoritetet nuk kanë konfirmuar deri më tani një motiv zyrtar dhe as ndonjë lidhje të drejtpërdrejtë mes vrasjes dhe aktivitetit të mëparshëm të viktimës.
Nga një arrestim në Shqipëri te hetimet ndërkombëtare
Emri i Luka Beqirajt ishte shfaqur edhe më herët në kronikën kriminale shqiptare. Në vitin 2016, ai ishte arrestuar pas një konflikti të dhunshëm, gjatë të cilit dyshohej se kishte sulmuar një person tjetër, duke i shkaktuar plagë të rënda.
Vëmendja ndaj tij u shtua në shkurt të vitit 2019, kur autoritetet shqiptare dhe italiane finalizuan operacionin ndërkombëtar të koduar “Fiori di Primavera”, i njohur në Shqipëri edhe si “Lulet e Pranverës”.
Hetimet kishin zgjatur rreth dy vite dhe synonin goditjen e disa grupeve të dyshuara për trafikimin ndërkombëtar të lëndëve narkotike, armëve dhe municioneve. Operacioni çoi në lëshimin e 27 urdhërarresteve, 21 për shtetas shqiptarë dhe gjashtë për shtetas italianë.
Mes personave të arrestuar ishte edhe Beqiraj, i dyshuar për përfshirje në organizatën kriminale që vepronte mes Shqipërisë dhe Italisë.
Rrjeti me bazë në Leçe dhe aktivitet në disa rajone italiane
Sipas të dhënave të hetimeve të asaj kohe, organizata kishte bazat kryesore operative në provincën e Leçes, ndërsa aktiviteti i saj shtrihej në disa rajone të Italisë, përfshirë Kalabrinë, Toskanën, Siçilinë, Ligurinë, Lombardinë dhe Emilia-Romagnën.
Grupi dyshohej se siguronte në Shqipëri kryesisht kanabis, i cili transportohej përmes Adriatikut drejt Italisë. Krahas narkotikëve, hetuesit kishin dokumentuar dyshime edhe për trafikimin e armëve dhe municioneve, të cilat, sipas hetimeve, përfundonin në duart e grupeve të përfshira në aktivitetin e narkotrafikut.
Në kuadër të këtij operacioni, në Vlorë u arrestuan gjashtë persona, mes tyre edhe Luka Beqiraj. Më 14 shkurt 2019, Gjykata e Vlorës caktoi ndaj tyre masën e sigurisë “arrest me burg” për një periudhë 40-ditore, në pritje të dokumentacionit të kërkuar nga autoritetet italiane.
Nga informacionet e bëra publike nuk rezulton qartë përfundimi i procesit gjyqësor ndaj Beqirajt dhe nëse ndaj tij është dhënë një vendim penal i formës së prerë për akuzat e ngritura në atë kohë.
Costa Blanca, në fokusin e hetimeve
Zona e Costa Blanca-s, ku ndodhi atentati, është përmendur në raportimet e mediave spanjolle në lidhje me praninë e personave dhe rrjeteve kriminale ndërkombëtare. Në këtë kontekst, eksperti i sigurisë José Luis Gil, përfaqësues në Spanjë i Shoqatës Europiane të Analistëve të Inteligjencës Kriminale, ka shpjeguar për “El Español” se atentatet në ambiente publike mund të përdoren si mesazhe paralajmëruese mes grupeve rivale, por edhe si mënyrë për zgjidhjen e konflikteve të brendshme.
Megjithatë, këto janë vlerësime të përgjithshme dhe nuk përbëjnë një konfirmim për motivin e vrasjes së shqiptarit.
Për momentin, hetuesit spanjollë po përpiqen të rindërtojnë lëvizjet e viktimës para atentatit, të identifikojnë autorin dhe të përcaktojnë nëse ngjarja ka lidhje me ndonjë konflikt të mëparshëm apo buron nga rrethana të tjera.
Shtatë vite pas arrestimit të tij në kuadër të operacionit kundër rrjetit italo-shqiptar, Luka Beqiraj u vra në një atentat në juglindje të Spanjës. Përtej të kaluarës së tij të raportuar në dosjet kriminale, mbetet tashmë në dorën e hetuesve të zbardhin se kush qëndron pas ekzekutimit dhe cili ishte motivi i vërtetë i tij.
