43-vjeçari shqiptar Fran Preldakaj, i cili është dënuar në mungesë me dy burgime të përjetshme për vrasjen e ish-partneres së tij dhe të partnerit të saj në vitin 2020, në Loutraki të Greqisë, dyshohet se ka pranuar autorësinë e dy vrasjeve të tjera të kryera në Shqipëri përpara vitit 2002.
Sipas raportimeve, pas kryerjes së këtyre krimeve ai ishte larguar drejt Greqisë, me qëllim që t’i shmangej përgjegjësisë penale. Ndërkohë, autoritetet shqiptare e kërkonin përmes Interpolit, me një njoftim ndërkombëtar kërkimi, për një rast të dyshuar të tentativës për grabitje me armë, në bashkëpunim me persona të tjerë.
Sipas policisë greke, 43-vjeçari u arrestua në zonën e Kato Patisia, në Athinë, teksa lëvizte me dokument identifikimi të falsifikuar. Ai dyshohet se po përgatitej të kryente një tjetër sulm kriminal.
Hetuesit grekë e konsiderojnë atë një person me precedentë të rëndë penalë, i dyshuar edhe për përfshirje në vrasje të porositura kundrejt pagesës. Aktualisht po hetohet lidhja e tij e mundshme me dy vrasje të tjera, të cilat, sipas autoriteteve, kanë elemente që ngjasojnë me ekzekutime me pagesë.
Ndaj tij rezultonin gjashtë vendime gjyqësore të pazbatuara, që lidhen me vepra të rënda penale, përfshirë vrasje me dashje në rrethana të qeta, grabitje dhe zjarrvënie të qëllimshme ndaj pasurisë së tjetrit.
Si u bë i mundur arrestimi
Lokalizimi i tij u bë pas një pune hetimore dhe përpunimit të informacioneve nga strukturat e policisë greke që hetojnë krimet kundër jetës dhe pronës.
Operacioni u zhvillua në një apartament në zonën e Kato Patisia, në prani të një prokurori dhe me mbështetjen e forcave speciale EKAM.
Gjatë kontrollit në banesën ku qëndronte, policia sekuestroi:
Një pistoletë në ngjyrë argjendi, me dorezë druri;
Dy granata dore funksionale;
Dy mekanizma shpërthyes;
Tri palë pranga metalike;
Një leje qëndrimi në emër të një personi tjetër, me fotografinë e të arrestuarit.
Pas arrestimit, ndaj tij u ngritën edhe akuza për kundërshtim dhe ushtrim dhune ndaj punonjësve të policisë dhe zyrtarëve gjyqësorë, falsifikim dokumentesh, si dhe shkelje të legjislacionit për armët dhe të huajt.
Vrasja e dyfishtë në Loutraki
Dy burgimet e përjetshme, për të cilat ishte dënuar në mungesë, lidhen me një vrasje të dyfishtë të ndodhur në datat 10–11 nëntor 2020, në një banesë në zonën e Loutrakit, në Korinth.
Sipas dosjes hetimore, Preldakaj dyshohet se vrau me sëpatë ish-partneren e tij, me origjinë ukrainase, dhe partnerin e saj të asaj kohe, një farmacist nga zona.
Pas ngjarjes, ai dyshohet se mori para dhe bizhuteri nga viktimat. Më pas, transportoi automjetin e gruas në një zonë të izoluar dhe i vuri flakën, në përpjekje për të zhdukur gjurmët e krimit.
Kërkohej edhe nga autoritetet shqiptare
Në kuadër të bashkëpunimit ndërkombëtar policor, autoritetet greke komunikuan me palën shqiptare përmes zyrës së Interpolit në Drejtorinë e Bashkëpunimit Ndërkombëtar Policor.
Nga verifikimet rezultoi se ndaj tij ishte në fuqi një njoftim ndërkombëtar kërkimi i lëshuar nga Shqipëria, lidhur me dyshimin për tentativë grabitjeje të armatosur në bashkëpunim.
Ndërkohë, gjatë operacionit u arrestua edhe një shtetase e huaj, 41 vjeçe, e dyshuar për strehimin e një personi të kërkuar nga drejtësia dhe për shkelje të legjislacionit për të huajt.
Sipas policisë greke, i arrestuari rezulton i përfshirë edhe më parë në çështje që lidhen me drogën, grabitjet, shkeljen e ligjit për armët, pastrimin e parave dhe shkeljet e legjislacionit për lojërat e fatit.
