Spiunonte tek rusët, arrestohet në Britani Oficer i lartë amerikan
Një oficer i lartë ushtarak amerikan 41-vjeçar është arrestuar dhe po mbahet në Britani nën dyshimin për spiunazh për Rusinë, tha të hënën policia britanike kundër terrorizmit.
Ushtaraku amerikan u arrestua javën e kaluar pranë qytetit të Gloucester, në Anglinë jugperëndimore, si pjesë e një hetimi mbi shkelje të mundshme të legjislacionit të sigurisë kombëtare.
Sipas informacioneve të BBC-së , 41-vjeçari po shërbente në bazën ushtarake Imjin Barracks në Innsworth, Gloucestershire, ku ndodhet selia e Korpusit Aleat të Reagimit të Shpejtë të NATO-s (ARRC).
Akuzat që po hetohen nga autoritetet
Policia britanike fillimisht tha se oficeri u arrestua sipas neneve 1 dhe 3 të Aktit të Sigurisë Kombëtare të vitit 2023.
Dispozitat lidhen me marrjen ose zbulimin e informacionit të klasifikuar dhe ndihmën ndaj një shërbimi të inteligjencës së huaj.
Policia Britanike Kundër Terrorizmit konfirmoi se oficeri tani është në paraburgim të autoriteteve ushtarake amerikane si pjesë e një hetimi mbi dyshimet që lidhen me sigurinë kombëtare dhe spiunazhin.
Amerikanët morën përsipër hetimin
Kreu i Policisë Britanike Kundër Terrorizmit konfirmoi se çështja iu dorëzua autoriteteve amerikane.
“Më pas u mor vendimi që hetimi t’ua kalonte partnerëve tanë amerikanë për të vazhduar”, tha ai.
Rasti përfshin një ushtarak që shërben në një bazë të NATO-s në Britani, gjë që i jep rëndësi të veçantë hetimit mbi akuzat për spiunazh.
Identiteti i oficerit, lloji i informacionit që dyshohet se është përfshirë në rast apo detaje të mëtejshme rreth lidhjes së tij të mundshme me inteligjencën ruse nuk janë bërë ende publike.Informacioni i identitetit të oficerit
Sipas informacioneve të reja, autoritetet ushtarake amerikane e kanë identifikuar personin e arrestuar si nënkolonel Brandon Carroll Tyner, 41 vjeç, i cili ka shërbyer në Ushtrinë Amerikane që nga viti 2008.
Sipas Washington Post, zyrtarët e njohur me rastin thanë se asnjë informacion i klasifikuar nuk ishte transferuar në Rusi para arrestimit të tij.
Hetimi tani po vazhdon nga autoritetet amerikane, ndërsa oficeri mbetet i dyshuar dhe nuk është shpallur fajtor për spiunazh.

