2.2 milionë persona në Greqi marrin 400 euro dhuratë nga Qeveria
GREQI -Ndihma financiare prej 400 eurosh: Kush përfiton dhe kush mbetet jashtë skemës?
Në fillim të javës së ardhshme, dhe në çdo rast përpara pagesës së pensioneve të muajit dhjetor (më 25 dhe 27 të muajit), pritet të shpërndahet ndihma financiare prej 400 eurosh për rreth 2.2 milionë pensionistë, persona me aftësi të kufizuara dhe të moshuar të pasiguruar.
Data më e mundshme e pagesës është e hëna, 23 nëntor, çka do të thotë se shumat mund të kalojnë në llogaritë bankare që nga e premtja, 20 nëntor. Megjithatë, nëse procedurat e nevojshme nuk përfundojnë në kohë, për shkak edhe të mungesës së ministrit të Punës, i cili ndodhet në Uashington, pagesa mund të shtyhet për të hënën ose të martën.
Një nga veçoritë kryesore të kësaj ndihme është se nuk parashikohen kufizime në bazë të të ardhurave apo pasurisë për kategoritë që përfitojnë prej saj.
Pra, masa e pensionit, të ardhurat e përgjithshme familjare dhe vlera e pasurive të paluajtshme nuk ndikojnë në të drejtën për ta përfituar ndihmën. Kriteret përcaktuese janë mosha dhe statusi i përfituesit, sipas përcaktimeve të legjislacionit përkatës.
Kush do të përfitojë 400 euro?
Ndihmën do ta përfitojnë të gjithë pensionistët që kanë mbushur 65 vjeç deri më 31 dhjetor 2025. Kjo do të thotë se, për të përfituar pagesën, ata duhet të kenë mbushur tashmë 66 vjeç gjatë vitit 2026.
Për rrjedhojë, jashtë skemës mbeten pensionistët që kanë mbushur 65 vjeç në periudhën nga 1 janari deri më 23 nëntor 2026.
Kush përfiton më shumë?
Ndër përfituesit kryesorë janë çiftet e pensionistëve, të cilët do të marrin dyfishin e ndihmës, pasi nuk zbatohen kufizime mbi të ardhurat apo pasurinë.
Sipas të dhënave të publikuara:
Rreth 270 mijë pensionistë mbi 65 vjeç, të cilët nuk kishin përfituar pagesën vjetore prej 250 eurosh, do të marrin këtë herë drejtpërdrejt 400 euro.
Rreth 2 milionë pensionistë, persona në kushte të vështira ekonomike dhe persona me aftësi të kufizuara, të cilët më parë përfitonin 250 euro, këtë vit do të marrin 400 euro.
Kush mbetet jashtë përfitimit?
Numri i saktë i pensionistëve që nuk do të përfitojnë nga kjo ndihmë nuk mund të përcaktohet me saktësi.
Megjithatë, sipas Rrjetit të Unifikuar të Pensionistëve (ENDYSY), ndihma prej 400 eurosh do t’u shpërndahet rreth 2.2 milionë përfituesve.
Ndërkohë, sipas të dhënave të muajit tetor, të publikuara në raportin «ILIOS» të EFKA-s, numri i përgjithshëm i pensionistëve arrin në 2.542.800.
Kjo do të thotë se afro 350 mijë pensionistë mund të mbeten pa përfituar asnjë euro nga kjo ndihmë.
Ndër më të prekurit janë pensionistët nën 65 vjeç, të cilët marrin pensione të ulëta. Kështu, krijohet një situatë që konsiderohet e padrejtë: një pensionist me të ardhura të larta mund të përfitojë 400 euro, ndërsa një tjetër me pension shumë të ulët mund të përjashtohet vetëm për shkak të moshës.
Por, përveç kriterit të moshës, Rrjeti i Unifikuar i Pensionistëve evidenton edhe disa padrejtësi të tjera në skemën e re:
Fëmijët që kanë humbur të dy prindërit, të cilët mbeten jashtë skemës së përfitimit.
Vejushat dhe pensionistët me aftësi të kufizuara nën moshën 60 vjeç, të cilët nuk do të marrin asnjë euro.
Pensionistët me të ardhura të ulëta që kanë punuar në Greqi, të cilët marrin një pension prej vetëm 470 eurosh, pasi kanë plotësuar 4.500 ditë pune, por që janë nën moshën 65 vjeç, nuk do të përfitojnë ndihmën. Ndërkohë, pensionistët që marrin pension nga jashtë vendit, edhe nëse kanë vetëm 3-4 vite kontribute sigurimesh në Greqi, do ta përfitojnë normalisht pagesën.
Nga ana tjetër, ndihma prej 400 eurosh do t’u jepet edhe pensionistëve mbi 60 vjeç që përfitojnë vetëm pension familjar (pension vejushërie), personave me aftësi të kufizuara, pavarësisht moshës, si dhe të moshuarve të pasiguruar.
Kostoja totale e kësaj mase për buxhetin e shtetit vlerësohet në rreth 879 milionë euro.

