Norvegji: Sulm kibernetik ndaj Equinor, furnizuesit më të madh të gazit natyror në Evropë
Një sulm kibernetik është duke u zhvilluar kundër sistemeve të informacionit të grupit norvegjez të energjisë Equinor , njoftoi grupi i energjisë të martën, duke sqaruar megjithatë se as aktivitetet operative dhe as prodhimi i naftës dhe gazit nuk janë prekur .
Kompania, e cila është furnizuesi më i madh i gazit natyror në Evropë , tha në një deklaratë se deri më tani nuk ka indikacione për vjedhje të të dhënave, ndërsa janë marrë masa për të adresuar dhe neutralizuar sulmin.
Një zëdhënës i Equinor nuk pranoi të jepte detaje të mëtejshme rreth natyrës dhe shkallës së incidentit.
Sipas agjencisë norvegjeze të lajmeve NTB , e cila citon kompaninë, sulmi kibernetik ka shkaktuar probleme në përdorimin e aplikacioneve të IT-së dhe në sistemet e brendshme të grupit .
Ndërkohë, një burim brenda Equinor, i cili foli me Reuters në kushte anonimiteti, konfirmoi se sistemi i email-it të kompanisë është çaktivizuar .
Autoritetet norvegjeze të sigurisë në gatishmëri
Autoriteti Norvegjez i Sigurisë Kombëtare (NSM) njoftoi se është informuar për incidentin dhe po monitoron zhvillimet.
” Ne ofrojmë ndihmë aty ku është e nevojshme “, tha një zëdhënës i agjencisë, pa dhënë më shumë detaje.
Sulmi kibernetik ndaj Equinor vjen në një kohë kur autoritetet norvegjeze kanë paralajmëruar tashmë për një rritje të konsiderueshme të kërcënimeve kibernetike kundër infrastrukturës kritike .
Muajin e kaluar, NSM e përmirësoi vlerësimin e saj të rrezikut të sulmeve kibernetike në nivelin 4 në një shkallë me pesë pikë , duke i nxitur qytetarët të përgatiten për pasojat e mundshme të sulmeve ndaj infrastrukturës jetësore, siç janë rrjetet e ujit dhe energjisë elektrike .
Sipas agjencisë, sulmet kibernetike të suksesshme kundër bizneseve norvegjeze janë trefishuar në gjashtë muajt e fundit , një zhvillim që nxjerr në pah ekspozimin në rritje të vendit ndaj kërcënimeve dixhitale.
” Incidenti me të cilin po përballet Equinor sot konfirmon se rreziku është me të vërtetë i lartë “, theksoi të martën zëdhënësi i NSM-së.

