Skandali te Trita Hospital! Mjekët e përjashtuar në Itali, punonin në Tiranë
Kirurgu plastik italian Marco Procopio është licencuar për të ushtruar profesionin në Shqipëri nga Urdhri i Mjekëve të Shqipërisë më 11 gusht 2025. Ai filloi punë në spitalin privat “Trita Hospital” në Tiranë.
Por 9 muaj më parë, në nëntor 2024, një paciente 22-vjeçare humbi jetën në klinikën e tij në Romë pas një operacioni estetik në hundë. Sipas mediave italiane, ndërhyrja u krye në një apartament që nuk kishte autorizim për operacione.
Pas ngjarjes, Prokuroria italiane nisi hetim penal ndaj Marco Procopio për vrasje nga pakujdesia. Gjykata vendosi pezullimin e licencës së tij për ushtrimin e profesionit në Itali për një periudhë 1-vjeçare, derisa drejtësia të japë vendimin përfundimtar.
Ndërkohë në Shqipëri, ai ka marrë licencë si mjek jo rezident për 5 vite, që i lejon të punojë deri në vitin 2030.
Së fundmi edhe Prokuroria e Tiranës ka nisur hetim për aktivitetin e tij në Trita Hospital.
Urdhri i Mjekëve në Shqipëri thotë se ndaj mjekut nuk ka asnjë ankesë apo sinjalizim për shkelje profesionale në vend. Sipas drejtuesit Dritan Trepça, ligji nuk lejon masa disiplinore pa një vendim të formës së prerë nga drejtësia.
Nga ana tjetër, Ministria e Shëndetësisë thotë se kontrollet në spitale publike dhe private kryhen dy herë në vit dhe zakonisht janë të njoftuara paraprakisht.
Inspektime të menjëhershme kryhen vetëm kur ka denoncime ose dyshime për shkelje. Kontrollet fokusohen kryesisht te dokumentacioni i spitalit dhe i stafit mjekësor.
Ministrja e Shëndetësisë Evis Sala deklaroi se spitalet private kanë të njëjtat detyrime si institucionet shtetërore dhe duhet të punësojnë vetëm mjekë të licencuar.
Situata krijon një boshllëk ligjor. Një mjek që hetohet në vendin e tij për çështje penale që lidhen me profesionin, mund të vazhdojë të punojë në Shqipëri nëse nuk ka ankesa ndaj tij.
Një rast tjetër në të njëjtin spital është ai i mjekut italian Andrea Formiga, i licencuar në Shqipëri më 9 prill 2025.
Një pacient italian 54-vjeçar që ai solli nga Milano për operacion në Tiranë, ndërroi jetë në QSUT katër ditë pas ndërhyrjes për ngushtimin e stomakut në dhjetor 2025. Operacioni ishte kryer në Trita Hospital dhe kushtonte rreth 4.400 euro, shumë më pak se 15 mijë euro në Itali.
Pas këtij rasti, Ministria e Shëndetësisë dërgoi një grup inspektimi në spital në fillim të shkurtit. Por kontrolli nuk vijoi, sepse dokumentacioni mjekësor ishte sekuestruar nga prokuroria.
