Skandali financiar në Bashkinë Dibër: 2 milionë euro problematika dhe asnjë përgjigje ndaj KLSH-së
196 milionë lekë problematika financiare në Bashkinë Dibër, KLSH zbulon mungesë llogaridhënieje
Kontrolli i Lartë i Shtetit ka evidentuar problematika financiare në vlerën 195.9 milionë lekë në Bashkinë Dibër, ndërsa institucioni vendor nuk ka respektuar detyrimet ligjore për raportimin e zbatimit të rekomandimeve të auditimit.
Gjetjet janë bërë publike në raportin përfundimtar të auditimit financiar, ku KLSH ka analizuar jo vetëm situatën financiare të Bashkisë, por edhe mënyrën se si janë trajtuar rekomandimet e lëna nga kontrollet e mëparshme.
Sipas dokumentacionit të bërë publik nga infonews.al, auditimi i mëparshëm, që përfshinte periudhën 2023–2024, kishte evidentuar 94,374,651 lekë të ardhura të munguara për buxhetin vendor.
Ndërkohë, audituesit kishin konstatuar edhe 101,618,041 lekë efekte negative financiare në administrimin e fondeve publike, për të cilat kishin kërkuar marrjen e masave korrigjuese.
Në total, problematikat financiare të evidentuara arrijnë në 195,992,692 lekë, ose rreth 2 milionë euro.
Përveç rekomandimeve financiare, KLSH kishte lënë edhe 44 masa organizative dhe 13 masa disiplinore, të cilat ishin pranuar nga Bashkia Dibër.
Megjithatë, raporti i fundit evidenton një tjetër problem: mungesën e raportimit nga ana e Bashkisë për zbatimin e këtyre rekomandimeve.
Raporti i mëparshëm i auditimit i ishte dërguar zyrtarisht Bashkisë Dibër më 2 dhjetor 2025. Sipas detyrimeve ligjore, institucioni duhej të informonte KLSH-në brenda 20 ditëve për planin e masave që do të ndërmerrte.
Por nga verifikimi i dokumentacionit, audituesit kanë konstatuar se Bashkia nuk kishte kthyer përgjigje brenda afatit të përcaktuar.
E njëjta situatë është konstatuar edhe për detyrimin e raportimit brenda gjashtë muajve mbi ecurinë e zbatimit të rekomandimeve. Edhe pas përfundimit të këtij afati, Bashkia nuk kishte raportuar pranë KLSH-së.
Problemet me llogaridhënien nuk përfundonin këtu. Sipas raportit, megjithëse Bashkia kishte hartuar një plan veprimi për rekomandimet, ajo nuk kishte raportuar në mënyrë të rregullt as përpara Këshillit Bashkiak.
Ky detyrim parashikohet në nenin 50 të ligjit për financat e vetëqeverisjes vendore, i cili përcakton përgjegjësinë e kryetarit të Bashkisë për hartimin e planit të veprimit dhe raportimin periodik në Këshillin Bashkiak.
Një tjetër konstatim shqetësues lidhet me mungesën e masave për ngritjen e një sistemi efektiv të menaxhimit financiar dhe kontrollit të brendshëm. Sipas KLSH-së, për këtë rekomandim Bashkia nuk kishte ndërmarrë asnjë veprim.
Ndërkohë, në auditimin e fundit, Kontrolli i Lartë i Shtetit ka dhënë edhe opinion të kualifikuar për pasqyrat financiare të vitit 2025, për shkak të gabimeve materiale dhe mangësive të konstatuara në raportimin e pasurive dhe detyrimeve financiare.
Në këtë mënyrë, raporti evidenton një sërë problematikash në administrimin e financave publike, zbatimin e rekomandimeve të auditimit dhe përmbushjen e detyrimeve për transparencë dhe llogaridhënie nga ana e Bashkisë Dibër.
