DOSJA E SPAK/ Zbardhet dëshmia e sanitares: Pastroja 6 vila, nuk kam parë asnjë lekë me sy te shtëpia e Igli Tares
Detaje të reja dalin nga dosja e SPAK në lidhje me hetimin ndaj ish-zëvendëskryeministres Belinda Balluku dhe vilën në kompleksin luksoz White Rocks në Dhërmi.
Detajet lidhen me dëshmitë e një pastrueseje që punonte në kompleks, si dhe të bashkëshortit të saj, Lavdrim Smone, të cilët janë marrë në pyetje nga Prokuroria e Posaçme.
Sipas deklarimeve të referuara nga dosja, pastruesja ka shpjeguar se kryente shërbime pastrimi në gjashtë vila të familjeve të ndryshme në White Rocks.
Mes tyre ishte edhe vila në pronësi të Igli Tares, të cilën ajo e pastronte një herë në javë dhe që, sipas dëshmive, frekuentohej herë pas here për pushime verore edhe nga ish-zëvendëskryeministrja Belinda Balluku.
Gjatë marrjes në pyetje, pastruesja është pyetur edhe për praninë e mundshme të shumave të parave në këtë vilë.
Ajo ka deklaruar se nuk kishte parë asnjëherë para në banesën e frekuentuar nga Balluku dhe, për rrjedhojë, nuk kishte realizuar fotografi të shumave të tilla në këtë ambient.
Një tjetër dëshmi e administruar nga SPAK është ajo e bashkëshortit të saj, Lavdrim Smone, në telefonin e të cilit është gjetur një fotografi e vitit 2021, ku shfaqen shuma parash.
Sipas deklarimeve të referuara, Smone ka mohuar të ketë parë para në vilën në pronësi të Igli Tares që lidheshin me Belinda Ballukun.
Ai gjithashtu nuk ka dhënë deklarime që ta lidhnin drejtpërdrejt fotografinë e gjetur në telefonin e tij me ish-zëvendëskryeministren.
Dëshmitë e çiftit janë pjesë e hetimit më të gjerë të SPAK mbi pronësinë dhe përdorimin e vilës në Dhërmi, e cila figuron në emër të Igli Tares, por që Prokuroria e Posaçme po heton nëse i përket faktikisht ish-zëvendëskryeministres Belinda Balluku. /
