Biznese që operojnë në pikat doganore të Durrësit dhe Kapshticës kanë ngritur pretendime për korrupsion, shpërdorim detyre dhe presion të dyshuar sistematik për përfitime të paligjshme. Në qendër të denoncimeve përmendet edhe zëvendësdrejtori i Përgjithshëm i Doganave, Erald Delilaj, ndërsa deri më tani nuk është bërë publik ndonjë rezultat konkret i verifikimeve.
Bizneset plasin denoncimet në SPAK dhe Prokurori për Drejtorinë e Përgjithshme të Doganave, nga ”laluci” i Bllatës te ”shefat” e Durrësit e Kapshticës
Sipas burimeve , gjatë muajve të fundit, pranë SPAK-ut, institucioneve të tjera të drejtësisë dhe strukturave të administratës doganore janë depozituar disa ankesa që ngrenë dyshime për funksionimin e një skeme të organizuar ryshfetesh në pikat doganore.
Bizneset pretendojnë se një grup doganierësh mund të veprojë në koordinim, duke ushtruar presion mbi operatorët ekonomikë dhe duke kushtëzuar procedurat doganore me pagesa të paligjshme. Në këto denoncime përmenden gjithashtu raste të dyshuara favorizimi të subjekteve të caktuara tregtare.
Denoncimet përfshijnë shuma parash dhe raste konkrete
Një prej dokumenteve të siguruara nga redaksia përmban pretendime për episode konkrete të ryshfetit, emra biznesesh të dyshuara si përfituese, data dhe shuma parash. Sipas burimeve, këto të dhëna kërkojnë verifikim të plotë nga organet kompetente për të përcaktuar nëse ka shkelje ligjore dhe përgjegjësi individuale.
Në dokument përmenden edhe dyshime për asgjësimin e një sasie malli të raportuar si të dëmtuar në Doganën e Durrësit, si dhe pretendime për pagesa të paligjshme që lidhen me kalimin e cigareve, pijeve energjike dhe furgonëve nga Anglia.
Redaksia bën me dije se këto akuza po verifikohen edhe përmes burimeve të tjera, ndërsa deri në përfundimin e verifikimeve ato mbeten pretendime të pakonfirmuara zyrtarisht.
Dyshime për kontrabandë dhe favorizime doganore
Sipas ankesave, problematikat e raportuara nuk kufizohen vetëm te kërkesat e dyshuara për ryshfet. Ato përfshijnë edhe kalimin e mundshëm të mallrave kontrabandë, manipulimin e vlerave doganore të automjeteve, trajtimin preferencial të disa importuesve dhe vendosjen e tarifave të paligjshme ndaj bizneseve.
Në materialet e denoncimit përmendet gjithashtu një person që pretendohet se ka lidhje me grupin e dyshuar dhe që vepron në Doganën e Bllatës, i identifikuar me nofkën “laluci”. Edhe ky pretendim kërkon verifikim nga institucionet përgjegjëse.
Pritet reagimi i institucioneve
Sipas burimeve ankesat u janë drejtuar disa institucioneve, përfshirë SPAK-un, Drejtorinë e Përgjithshme të Doganave dhe struktura të tjera të drejtësisë e të administratës doganore.
Megjithatë, deri në momentin e publikimit, nuk është bërë publik ndonjë rezultat hetimor, verifikim administrativ apo masë konkrete që lidhet me pretendimet e ngritura nga bizneset.
Për të sqaruar nëse denoncimet janë regjistruar, nëse kanë nisur verifikimet dhe çfarë veprimesh janë ndërmarrë, redaksia e skyweb.al u është drejtuar institucioneve përkatëse me kërkesa zyrtare për informacion.
Përgjigjet e tyre pritet të hedhin dritë mbi trajtimin institucional të këtyre ankesave dhe mbi ekzistencën ose jo të procedurave verifikuese.
Deri në një reagim zyrtar dhe në përfundimin e hetimeve të mundshme, pretendimet e bëra në denoncime nuk përbëjnë fakte të provuara dhe përgjegjësia për çdo shkelje të mundshme duhet të përcaktohet nga organet kompetente./Infonews.al
