Për të disatin muaj me radhë, kompania e sigurimeve SIGAL ka ulur dëmshpërblimet për sa i përket aksidenteve rrugore dhe dëmeve të tjera motorike. Sipas raportit të fundit të AMF, ku krahasohet periudha janar – shtator 2025 me të njëjtën periudhë të një viti më parë, rezulton se SIGAL, pavarësisht se është kompania më e madhe në vend për sigurimet, ka ulur dëmshpërblimet me 16%.
Edhe pse SIGAL ka rritur të ardhurat – gjë që vërehet nga rritja e Primeve Bruto për sigurimet motorike – kur vjen puna tek dëmshpërblimet, në pothuajse çdo muaj të krahasuar me një vit më parë, kompania shënon rënie.
Rriten siguracionet, por tek SIGAL i Avni Ponarit dëmshpërblimet bien gropë për 12 muaj rresht
Një situatë akoma më e rëndë vërehet për sa i përket dëmeve të paguara për Sigurimin e Kartonit Jeshil. Në këtë kategori, që përdoret për sigurimin e makinave kur udhëtojnë jashtë vendit, krahasuar me një vit më parë, SIGAL ka një ulje të dëmshpërblimeve me gati 56%.
Për dëmet motorike të paguara, një rënie të madhe ka shënuar edhe kompania INTERSIG, konkretisht me 25%, ndërsa Atlantik me gati 7%.
Të ardhurat nga primet e shkruara bruto të sigurimit për periudhën janar – shtator 2025 kapën vlerën 20,183 milionë lekë, ose 10.37% më shumë se në janar – shtator 2024.
Gjatë periudhës janar – shtator 2025, numri i kontratave të sigurimit të lidhura arriti në 1,249,988, me një rritje prej 6.16% krahasuar me të njëjtën periudhë të një viti më parë.
Sipas AMF, pagesat e dëmeve gjatë janar – shtator 2025 u ulën me 0.02% krahasuar me janar – shtator 2024. Pjesa më e madhe e dëmeve të paguara bruto i përket sigurimit motorik, me rreth 4,700 milionë lekë, ose 76.04% të totalit të dëmeve të paguara bruto.
