Një ngjarje tragjike ka ndodhur pasditen e sotme në Tiranë, ku 35-vjeçari Bledi Hasani ka humbur jetën brenda poligonit të qitjes “Action Target”, i cili është në pronësi të biznesmenit Emiljano Dusha dhe ndodhet në rrugën “Dervish Hima”. Sipas informacionit paraprak të policisë, dyshohet se Hasani është vetëvrarë me armën që po përdorte gjatë seancës së qitjes.
“Rreth orës 13:30, brenda një poligoni në rrugën ‘Dervish Hima’, dyshohet se është vetëvrarë me armën e zjarrit me të cilën po kryente qitje, shtetasi B. H., 35 vjeç. Shërbimet e Policisë ndodhen në vendngjarje dhe, në bashkëpunim me grupin hetimor, po punojnë për sqarimin e rrethanave dhe dokumentimin e plotë të rastit.”
Poligoni në pronësi të Emiljano Dushës
Skyweb.al mëson se poligoni “Action Target”, ku ndodhi ngjarja, është në pronësi të biznesmenit Emiljano Dusha, i cili njihet sëfundmi si ortak i shtetit në industrinë e prodhimit të municioneve dhe uniformave ushtarake.
Dusha është pronar i kompanisë MSSC, që zotëron 49 për qind të aksioneve të Guna Tactical, ndërsa 51 për qind zotërohet nga ndërmarrja shtetërore KAYO sh.a., e themeluar për zhvillimin e projekteve të mbrojtjes dhe sigurisë.
Ky partneritet publik-privat është bërë objekt debatesh për mënyrën e përzgjedhjes së MSSC-së si ortak i shtetit dhe për mungesën e transparencës në procesin e krijimit të kompanisë.
