Përparim Billa, i njohur edhe si “Rimi”, një shtetas shqiptar i dënuar në Shtetet e Bashkuara në kuadër të operacionit të koduar amerikan “Shqiponja e Zezë”, rezulton se ka zhvilluar aktivitet biznesi në Ekuador, ku është regjistruar si tregtar frutash. Zyra e Prokurorit pritet ta akuzojë zyrtarisht më 18 dhjetor në një çështje që lidhet me krimin e organizuar dhe trafikun e drogës.
Sipas gazetës ekuadoriane PRIMICIAS, Operacioni “Shqiponja e Zezë” u zhvillua nga FBI dhe autoritetet amerikane mes viteve 2005–2009, duke goditur atë që në atë kohë konsiderohej si një nga rrjetet kriminale me rritjen më të shpejtë në Evropë: mafian shqiptare. Hetimi katërvjeçar zbuloi një organizatë kriminale transnacionale me degë në Shqipëri, Maqedoni, Kosovë, Serbi, Kanada, Holandë dhe SHBA.
Operacioni kulmoi me padinë ndaj 26 personave dhe arrestimin e 17 prej tyre në New Jersey dhe New York. Në qendër të hetimeve ishin drejtuesit e rrjetit ballkanik, ndërsa lista e akuzave përfshinte trafik droge, armësh, kontrabandë cigaresh dhe pastrim parash. Gjatë hetimeve u sekuestruan mijëra pilula ekstazie, heroinë, metamfetaminë, armë zjarri dhe u dokumentuan negociata për importe të kontrolluara të lëndëve narkotike.
Në këtë dosje u përfshi edhe Përparim Billa, i cili në atë kohë ishte 38 vjeç. Ai u deklarua fajtor më 1 shtator 2009 për akuzën e marrjes së cigareve kontrabandë, një aktivitet që, ndonëse më pak spektakolar se trafiku i drogës, rezultonte shumë fitimprurës për rrjetin kriminal. Krimi ishte kryer më 7 tetor 2008 dhe përfshinte një seri transaksionesh kontrabande cigaresh gjatë viteve 2008–2009.
Pas vuajtjes së dënimit në SHBA, Billa shfaqet sërish në dokumente zyrtare, këtë herë në Hemisferën Jugore. Sipas Shërbimit të të Ardhurave të Brendshme të Ekuadorit (SRI), në janar 2013 ai u regjistrua si person fizik me RUC për tregti me shumicë të frutave, perimeve dhe bishtajoreve, duke hapur edhe një biznes në Quito, në zonën e Avenida República de El Salvador. Ky aktivitet u mbyll në vitin 2022.
Të dhënat doganore tregojnë gjithashtu se Billa ka pasur lidhje tregtare me një kompani të themeluar në Emiratet e Bashkuara Arabe, përmes së cilës realizoi një import në shtator 2020. Ndërkohë, dokumentet publike në Shqipëri tregojnë se një person me emrin Përparim Billa figuron si administrator i kompanisë LOV TAXI, e themeluar në maj 2023 në Tiranë, e fokusuar në shërbime transporti dhe taksie.
Autoritetet ekuadoriane po hetojnë tashmë lidhjet e tij të dyshuara me mafian ballkanike, ndërsa çështja pritet të marrë zhvillime të reja me akuzën zyrtare të 18 dhjetorit.
