Edhe pse qeveria ka premtuar se do të rrisë financimet për trajtimin e pacientëve me sëmundje të rënda, realiteti i projektbuxhetit tregon një tjetër prioritet: vazhdimin e pagesave për koncesionet e përfolura të shëndetësisë.
Financimi i kontratave koncesionare hyn në një fazë të re në vitin 2025, por barra për buxhetin mbetet e lartë. Dy nga marrëveshjet më të kushtueshme — sterilizimi i instrumenteve kirurgjikale dhe shërbimi i dializës — do të vazhdojnë të përthithin miliona euro deri në fund të 2026-s, përpara se të mbyllen përfundimisht.
Vetëm për sterilizimin, pagesat arrijnë kulmin vitin që vjen me 1.9 miliardë lekë, përpara se të bien në 500 milionë në 2026. Ndërsa për dializën, fondet do të shkojnë në 960 milionë lekë në 2025 dhe 815 milionë në 2026, për t’u mbyllur më pas. Në total, këto dy kontrata i kanë kushtuar shtetit rreth 250 milionë euro në periudhën 2016-2026.
Por ndërsa këto dy marrëveshje po shkojnë drejt fundit, një tjetër po merr gjithnjë e më shumë peshë: kontrata e laboratorëve, që zgjat deri në vitin 2030. Ajo po shndërrohet në boshtin kryesor të skemës PPP në shëndetësi, me fonde që rriten çdo vit — nga 1.8 miliardë lekë në 2024 në 2.15 miliardë në 2027 — duke u dyfishuar krahasuar me parashikimet fillestare.
Këto kontrata, të firmosura në vitin 2016, janë përmendur në mënyrë të përsëritur në raportet e Kontrollit të Lartë të Shtetit dhe kanë qenë objekt hetimesh nga SPAK për fryrje kostosh, pagesa të pajustifikuara dhe procedura të dyshimta.
Në kontrast me këtë, programet për trajtimin e pacientëve me kancer mbeten me buxhet të kufizuar, ndërsa shumë prej tyre detyrohen të blejnë vetë ilaçet jetike jashtë vendit.
Në praktikë, ndonëse qeveria shpall rritje të fondeve për pacientët, shëndetësia publike do të vazhdojë të paguajë faturën e koncesioneve që po hetohen për abuzime.
