Kush s’paguan administratorin i bllokohet prona krahas gjobave.
Borxhet e administrimit të pallatit mund të bllokojnë shitjen e apartamentit në Kadastër
Mospagimi i tarifës së administrimit të pallatit mund të sjellë regjistrimin e një kufizimi në Kadastër, duke penguar shitjen, dhurimin apo vendosjen e hipotekës mbi apartamentin deri në shlyerjen e detyrimeve. Masa parashikohet në rregulloren tip të qeverisë për administrimin e banesave dhe ndërtesave.
Sipas rregullores, administratori ose shoqëria administruese mund të kërkojë vendosjen e kufizimit në dy raste: kur pronari nuk ka paguar detyrimet për të paktën 12 muaj, ose kur vlera e borxhit të papaguar arrin të paktën 0,5% të vlerës së njësisë.
Këto dy kushte janë alternative. Për shembull, për një apartament me vlerë 10 milionë lekë, kufiri prej 0,5% përfaqëson një detyrim të papaguar prej 50 mijë lekësh.
Kufizimi regjistrohet në kartelën e pronës dhe pengon kryerjen e veprimeve të caktuara juridike. Sipas rregullores, apartamenti nuk mund të shitet, të dhurohet, të kalohet në përdorim apo të ngarkohet me barrë dhe të drejta të tjera reale pa u vërtetuar më parë shlyerja e detyrimeve.
Megjithatë, kjo masë nuk ia heq pronarit pronësinë mbi apartamentin dhe nuk parashikon largimin e tij nga banesa.
Procedura për vendosjen e kufizimit
Për vendosjen e kufizimit duhet të ndiqet një procedurë e dokumentuar. Pronari duhet të njoftohet me shkrim të paktën 10 ditë përpara vendimmarrjes, ndërsa duhet të provohet se ai ka marrë dijeni për njoftimin.
Më pas, kryesia e bashkëpronarëve merr vendim me shumicë të cilësuar dhe autorizon administratorin të paraqesë kërkesën pranë Kadastrës. Kërkesës i bashkëngjiten dokumentet që vërtetojnë detyrimin e papaguar dhe njoftimin e pronarit.
Pas shlyerjes së borxhit, pronari mund të kërkojë heqjen e kufizimit duke paraqitur vërtetimin bankar për pagesën. Kadastra duhet të kryejë heqjen e tij brenda pesë ditëve nga depozitimi i dokumentit, pa qenë i nevojshëm një vendim i ri nga kryesia.
Kamatëvonesa dhe detyrimi për administrimin
Rregullorja parashikon gjithashtu kamatëvonesë në masën 30% të tarifës mujore për çdo muaj vonesë. Nëse tarifa e administrimit është 1.000 lekë, kamatëvonesa për një muaj vonesë të asaj pagese është 300 lekë.
Nga kjo kamatëvonesë përjashtohen pronarët që gëzojnë status dhe mbrojtje të veçantë ligjore, në përputhje me legjislacionin në fuqi.
Detyrimi për pagesën e administrimit mbetet në fuqi edhe kur apartamenti nuk përdoret. Fakti që banesa mbahet bosh nuk e përjashton pronarin nga pagesa, ndërsa çdo ulje e tarifës për raste të veçanta kërkon vendim të asamblesë së bashkëpronarëve.
Çfarë ndodh pas tre muajsh mospagim?
Kur tarifat dhe kamatëvonesat mbeten të papaguara për tre muaj radhazi, administratori duhet të informojë me shkrim kryesinë dhe asamblenë e bashkëpronarëve.
Ndërkohë, vendimi i kryesisë që përcakton detyrimet monetare përbën titull ekzekutiv, duke krijuar mundësinë që borxhi të ndiqet përmes procedurave të përmbarimit.
Rregullat synojnë të garantojnë mbledhjen e detyrimeve për administrimin dhe mirëmbajtjen e ndërtesave, duke parashikuar masa konkrete ndaj pronarëve që nuk përmbushin detyrimet financiare.
