Rreth 6 000 avionë të familjes Airbus A320 janë përfshirë në një urdhër të detyrueshëm rikthimi për përditësimin e softuerit, (programeve kompjuterike të avionit) duke shkaktuar anulime dhe vonesa të shumta në fluturime në mbarë botën. Masa erdhi pas një incidenti të muajit të kaluar, ku një avion i JetBlue pësoi rënie të papritur të lartësisë për shkak të një defekti në softuerin e kontrollit të fluturimit.
Hetimet zbuluan nevojën për një përditësim të menjëhershëm, ndërsa disa modele kanë nevojë edhe për ndërhyrje teknike shtesë. Për këtë arsye, kompani ajrore të mëdha si American Airlines, Air France, Lufthansa, Avianca dhe të tjera kanë lajmëruar riorganizime orarësh, anulime dhe vonesa të shumta.
Si prek situata aeroportet dhe udhëtarët
Autoritetet e aviacionit në SHBA, Europë dhe Azi po mbikëqyrin nga afër procesin e përditësimit të softuerit për të garantuar sigurinë maksimale para rikthimit në fluturime normale. Situata ka krijuar shqetësim të madh tek udhëtarët, sidomos në një periudhë me fluks të shtuar udhëtimesh.
Edhe Aeroporti i Rinasit është prekur nga këto zhvillime. Megjithëse nuk ka të dhëna për anulime, çdo ditë avionë të këtij lloji ngrihen dhe ulen në Rinas.
Deri tani është regjistruar një anulim: disa fluturime të Air Albania,( ende nuk dihet nëese anulimet lidhen drejtëpërdrejtë me software) dërsa pritet që efektet e ndërprerjeve globale të ndihen edhe në ditët në vijim.
Probleme të reja të raportuara nga Airbus
Sipas Reuters, Airbus po përballet edhe me një tjetër sfidë të cilësisë, pasi në disa avionë të familjes A320 janë zbuluar çështje me panelet metalike. Këto probleme vijnë menjëherë pas tërheqjes për rregullimin e defektit kompjuterik, duke shtuar shqetësimet për prodhuesin europian.
Pse janë prekur kaq shumë fluturime?
Airbus A320 është një nga avionët më të përdorur në botë. Në Aeroportin e Rinasit, fluturimet me këtë model kryhen çdo ditë dhe mbulojnë destinacione të ndryshme europiane. Deri tani nuk ka paralajmërim zyrtar për pezullime të mëtejshme, por pritet një plan global për mënyrën se si do të kryhen përditësimet teknike.
Çfarë është Airbus A320?
• Avion i tipit “single-aisle / narrow-body” me dy motorë.
• Përdoret kryesisht për fluturime të shkurtra dhe të mesme (“short-haul” dhe “medium-haul”).
• Kapacitet tipik: 150–186 pasagjerë, sipas konfigurimit.
• Varianti A320-neo mbulon distanca deri në 6 500 km.
Cilat kompani përdorin gjerësisht avionë A320?
Airbus A320 është pjesë kryesore e flotave të shumë kompanive ajrore, si:
• Wizz Air
• Aegean Airlines
• easyJet
• Austrian Airlines
• Lufthansa
• Eurowings
• Air Albania
• Pegasus Airlines
• Vueling
• British Airways
Këto linja operojnë qindra fluturime ditore me familjen A320 (A319, A320, A321), prandaj çdo problem teknik ka efekt të menjëhershëm në trafik.
Air France anuloi 35 fluturime më 28 nëntor pasi disa aeroplanë A320 u hoqën për përditësim.
Lufthansa njoftoi se kishte “një numër të vogël” anulimesh dhe vonesash gjatë fundjavës për shkak të riparimeve / përditësimeve në A320-t e saj.
Wizz Air deklaroi se disa nga avionët e saj A320 ishin prekur dhe do të kalonin përditësime — kjo mund të rezultojë në vonesa në linjat që operon.
Per disa kompani më të vogla ose me flotë të A320 më të kufizuar (p.sh. Aer Lingus apo easyJet), ndërhyrjet u përshkruan si më pak me ndikim — por edhe ato paralajmëruan për “ndryshime në orar” ose “mundësi vonesash”.
Në disa vende — për shembull në Francë — efekti ishte më i dukshëm, me anulime konkrete dhe reagime të menjëhershme për të bërë përditësimet.