Fondet e Mbrojtjes nën hetim, në fokus edhe biznesi i kuajve
Hetimet e SPAK për përdorimin e fondeve publike të destinuara për Ministrinë e Mbrojtjes kanë zgjeruar pistat e verifikimit, duke përfshirë edhe aktivitetin e kompanisë “Timak Horse”, e cila operon në fushën e kuajve dhe hipizmit.
Sipas të dhënave që po verifikohen nga hetuesit, Arjeta Puca dhe Ron Yeffet kanë hapur biznesin “Timak Horse”, ndërsa aktiviteti i tij është i regjistruar në ambientet e Equos Resort, pronë e lidhur me biznesmenin Ergys Agasi.
Emrat e Pucës dhe Yeffet pritet të jenë në fokus të pyetjeve të SPAK këtë javë, në kuadër të hetimeve që kanë përfshirë edhe sekuestrimin e dokumentacionit dhe kontratave pranë Ministrisë së Mbrojtjes dhe kompanisë TIMAK.
Hetimi po zhvillohet në disa pista, mes të cilave dyshimet për pastrim parash, shpërdorim detyre dhe favorizim në procedurat e tenderimit dhe garave publike. Këto janë çështje që mbeten objekt verifikimi nga organet e drejtësisë dhe nuk përbëjnë konkluzione përfundimtare mbi përgjegjësinë penale të personave të përfshirë.
Në kuadër të një tjetër hetimi të SPAK, ai që lidhet me fondet e AKSHI-t, prokuroria ka analizuar mënyrën se si janë përdorur dhe qarkulluar fondet e kompanive të përfshira në procedurat publike. Tashmë, hetuesit po verifikojnë nëse ka pasur një mekanizëm të ngjashëm edhe në rastin e fondeve të lidhura me Ministrinë e Mbrojtjes.
Në këtë kuadër, aktiviteti i “Timak Horse” dhe marrëdhëniet financiare e tregtare që mund të kenë lidhje me TIMAK-un pritet të jenë pjesë e verifikimeve të mëtejshme të SPAK.
Ndërkohë, Equos Resort, ku është regjistruar aktiviteti i “Timak Horse”, rezulton i sekuestruar në kuadër të procedimeve të SPAK. Hetuesit po analizojnë lidhjet mes kompanive, personave dhe transaksioneve financiare për të përcaktuar nëse fondet publike janë përdorur në mënyrë të kundërligjshme.
