Nga ora 06:00 deri në 09:00, periudha kur rreziku për goditje në tru rritet ndjeshëm
Pse orët e para të mëngjesit konsiderohen më të rrezikshmet për goditjen në tru? Çfarë ndodh në organizëm pas zgjimit
Orët e para të mëngjesit mund të shoqërohen me një rritje të ndjeshme të rrezikut për goditje në tru (ishemike ose hemorragjike). Sipas disa studimeve shkencore, periudha nga ora 06:00 deri në 09:00 paraqet një rritje deri në 72% të rasteve, krahasuar me nivelin e pritshëm të rrezikut gjatë pjesës tjetër të ditës.
Ky fenomen lidhet me një sërë ndryshimesh biologjike që ndodhin në organizëm pas zgjimit. Gjatë këtyre orëve, tensioni arterial ka tendencë të rritet, ndërsa ndryshime pësojnë edhe mekanizmat e mpiksjes së gjakut. Këta faktorë mund të ndikojnë në sistemin kardiovaskular dhe të favorizojnë shfaqjen e problemeve serioze shëndetësore.
Një analizë e Universitetit Rush, e publikuar në vitin 1998 dhe e realizuar me të dhënat e afro 12 mijë pacientëve, zbuloi se rreziku për një goditje në tru ishte 72% më i lartë gjatë intervalit 06:00–09:00, krahasuar me nivelin e pritshëm.
Megjithatë, ekspertët theksojnë se kjo shifër përfaqëson një rritje relative të rrezikut dhe jo mundësinë që çdo individ të pësojë një goditje në tru gjatë këtyre orëve.
Në të njëjtën linjë, një studim i vitit 2002 nga Universiteti Wayne State raportoi se deri në gjysma e goditjeve të rënda në tru ndodhnin gjatë orëve të mëngjesit.
Këto të dhëna nënvizojnë rëndësinë e kujdesit ndaj shëndetit kardiovaskular, veçanërisht te personat që vuajnë nga tensioni i lartë i gjakut apo kanë faktorë të tjerë rreziku. Kontrolli i rregullt i tensionit, ndjekja e trajtimit të përshkruar nga mjeku dhe një stil jetese i shëndetshëm janë ndër masat që ndihmojnë në uljen e rrezikut.

