Policia e Bulqizës ka arrestuar pesë punonjës të stafit teknik të një subjekti minerar, pas një ngjarjeje të rëndë që ndodhi ditën e djeshme në një nga galeritë e minierës, ku humbi jetën 66-vjeçari Fari Veliu. Ngjarja dyshohet të ketë ndodhur si pasojë e rrëzimit të një masivi shkëmbor gjatë punës në nëntokë.
Të arrestuarit janë shtetasit Njazi Përkola, Besnik Çupi, Ferit Truka, Ervis Kadiu dhe Edmond Xhafa, të gjithë pjesë e stafit teknik të subjektit minerar. Sipas hetimeve paraprake, këta shtetas nuk kanë marrë masat e nevojshme për sigurimin teknik të mjedisit të punës, duke rrezikuar jetën e punonjësve.
Materialet procedurale janë referuar Prokurorisë së Rrethit Gjyqësor Dibër për veprime të mëtejshme, ndërkohë që ndaj të arrestuarve rëndon akuza për veprën penale “Shkelja e rregullave të mbrojtjes në punë”, me pasojë vdekjen.
Ngjarja ka ndodhur në një nga galeritë e kompanisë minerare “GERTI Shpk”, në pronësi të Jeton Danit, një emër i njohur në zonën e Bulqizës për aktivitetin e tij në industrinë minerare, si dhe për angazhimin politik në radhët e Partisë Socialiste. Në zgjedhjet lokale të fundit, djali i tij, Murat Dani, ishte kandidat për deputet në qarkun e Dibrës.
Hetimet për zbardhjen e plotë të rrethanave të kësaj ngjarjeje vijojnë.
