Ish-kreu i operacionales Oltion Bistri dhe ish prokurori i Shkodrës Xhevahir Lita, të arrestuar korrikun e vitit 2023 si pjesë e dosjes së bujshme “Metamorfoza” kanë rifituar lirinë.
Për prokurorin Lita SPAK kishte 6 vite burg për 2 raste korrupsioni dhe nxjerrje të akteve sekrete, por GJKKO e dënoi me 5 vite, që iu reduktua 3 vite e 4 muaj burg nga gjykimi i shkurtuar. Lita u lirua menjëherë, pasi dënimin e ka shlyer me kohën e paraburgimit.
Në vendimin e sotëm, dënim edhe me i lehtë iu dha nga GJKKO për ish-shefit të Operacionales, Oltian Bistri. Gjykata e shkallës së parë e shpalli të pafajshëm veprat e korrupsionit dhe pastrimit të parave, ndërsa e dënoi me 3 vite burg vetëm për zbulim të akteve sekrete. Dënimi i tij iu konvertua në dy vite prej gjykimit të shkurtuar dhe Bistri u la i lirë në sallë pasi e ka kryer dënimin. GJKKO rrëzoi edhe kërkesën e konfiskimit të 1.3 milion eurove që i ishin sekuestruar Bistrit.
Në vendimin që Gjykata e Posaçme ka shpallur për një pjesë të të pandehurve në dosjen “Metamorfoza”, ku përfshihen ish-zyrtarë policie, ish-prokurorë dhe biznesmenë, trupa gjykuese me tre gjyqtaret Etleva Deda, Flora Hajredini dhe Irena Gjoka dënoi ish efektivin e policisë Edmond Prekën me 10 vite e 6 muaj ë iu konvertua me 7 vite. Behar Brajovic, i njohur si Behar Bajri, dënua me 13 vite burg, dhe do të vuajë 8 vite e 8 muaj burg. Boksieri Astmer Bilali do të qëndrojë 5.8 vite qeli, nga 8 vite e gjysmë që u dha nga gjykata. Në total Gjykata dha 38 vite burg për 5 anëtarët e Metamorfozës.
Për biznesmenin Pëllumb Gjoka dhe Ardit Hasanbegajn, gjykata nuk shpalli vendim, pasi avokatët e tyre nuk paraqitën mbrojtjen. Vendimi për ta pritet më 2 dhjetor. Për Behar Bajrin, në seancën e kaluar SPAK kërkoi dënimin me 15 vite burg për sigurimin e kushteve për të kryer vrasjen atentat ndaj Kleanth Musabelliut. Për Edmond Preken u kërkua dënimi me 11 vite burg ndërsa boksierin Astmer Bilali dënimin me 10 vite burg. Ky i fundit akuzohet për sigurimin e kushteve për të kryer vrasje në dëm të Ibrahim Licit, Genc Tafilit dhe Dorian Dulit.
Ndërkohë për vrasjen e shtetasit Gjin Ndoj zbuluar nga dosja “metamorfoza” ku akuzohen biznesmeni Pëllumb Gjoka, Behar Bajri dhe Edmond Preka çështja është ndarë veçmas me procedurë të zakonshme. Krimet u zbardhën nga SPAK pas transkiptimeve në aplikacionin SKY ECC për të cilat avokatët e disa prej të pandehurve pretendojnë se janë përdorur në mënyrë të paligjshme nga organi akuzës.
Pëllumb Gjoka- vendimi do jepet më datë 2 dhjetor pasi nuk kanë bërë mbrojtjen avokatët e tij
Edmond Preka- 10 vite burg, me gjykim të shkurtuar zbret në 7 vite, burg i sigurisë së lartë
Behar Brajovic (Bajri)- 13 vite burg me gjykim të shkurtuar zbret në 8.8 vite, burg i sigurisë së lartë
Astmer Bilali- 8 vite e 6 muaj, 5.8 vite me gjykim te shkurtuar, burg i sigurisë së lartë
Ardit Hasanbegaj- vendimi do të jepet më 2 dhjetor pasi nuk ka bërë mbrojtjen avokati
Xhevahir Lita- 5 vite burgim, me gjykim të shkurtuar zbret në 3.4 vite, shuarje të masës arrest ne burg, lirimi menjëhershëm për shkak se e ka shlyer dënimin
Oltian Bistri- ish-kreu i Operacionales, shpallet i pafajshëm për korrupsion , fajtor për zbulim të akteve ose të dhënave sekrete, i pafajshëm për pastrim parash nuk ka fakte e prova, dënohet 2 vite, shuarje mase për Oltian Bistrin lirim i menjëhershëm. Rrëzohet kërkesa për konfiskimin e 1.3 milionë euro te SPAK për Bistrin.