Levë e Rusisë! Alarm në Europë për Raiffeisen Bank, sanksionet në tavolinë
Bashkimi Europian është duke shqyrtuar vendosjen e sanksioneve ndaj bankës austriake Raiffeisen për shkak të bizneseve të saj në Rusi.
Lajmi raportohet nga Bloomberg, sipas të cilit shumë vende të Bashkimit Europian janë duke kërkuar penalizimin me sanksione të bankës austriake, që po lehtëson transaksionet financiare të Rusisë në Europë, por po përballen me kundërshtimin e ashpër të Vienës.
Raiffeisen Bank në Shqipëri! Realiteti që djeg vetëm arkivat por jo borxhet
“Bashkimi Europian vonoi miratimin e paketës së 21-të të sanksioneve kundër Rusisë, duke penguar një përpjekje kritike për të frenuar ekonominë e luftës së Moskës për shkak të mosmarrëveshjeve mbi Raiffeisen Bank International AG të Austrisë dhe kufizimeve mbi gazin natyror të lëngshëm (LNG) rus,” raportoi Bloomberg.
Mosmarrëveshja për huadhënësin më të madh të Austrisë, Raiffeisen Bank International, mbetet një nga pengesat kryesore në Bruksel.
Bloomberg raportoi se disa shtete anëtare kanë kërkuar masa më të ashpra që synojnë institucionet financiare që lehtësojnë flukset e kapitalit në Rusi. Viena, nga ana tjetër, është përpjekur vazhdimisht ta mbrojë Raiffeisen nga masat kufizuese që mund të rrezikojnë operacionet e saj të mbetura fitimprurëse brenda vendit.Bllokimi i vazhdueshëm ka tërhequr kritika nga shtetet anëtare të Balltikut dhe Europës Lindore, të cilat paralajmërojnë se interesat ekonomike kombëtare po gërryejnë sigurinë kolektive.
Sulmohen me SMS klientët e Raiffeisen Bank, reagon institucioni: Ja çfarë duhet të bëni
Meqenëse sanksionet kërkojnë unanimitet midis 27 kryeqyteteve të BE-së, qeveritë kombëtare mund t’i vënë një çmim pëlqimit të tyre duke kërkuar lëshime të tjera.
Ish-kryeministri hungarez Viktor Orbán ishte një bllokues famëkeq i një mbështetjeje të tillë për Ukrainën, megjithëse shpresohej se Budapesti do të rezultonte më pak pengues pasi u rrëzua nga Péter Magyar në fillim të këtij viti.
Megjithatë, këtë herë, janë Austria dhe Greqia ato që janë shndërruar në barrikadën e konsensusit për raundin e ri të sanksioneve.
Vjena ka propozuar një marrëveshje sipas së cilës Raiffeisen Bank e Austrisë do të kompensohej për atë që e quan shpronësim të paligjshëm prej 2.44 miliardë eurosh të operacioneve të saj ruse.
Kërkesa do të përfshinte sekuestrimin dhe shitjen e 2.1 miliardë eurove në asete të ngrira ruse të vendosura në Austri; prona me përfitues fundor oligarkun rus Oleg Deripaska, një përfitues i shpronësimit të Raiffeisen.
E propozuar për herë të parë nga Komisioni Evropian më 9 qershor, paketa e 21-të e sanksioneve është pjesë e një fushate ekonomike shumëvjeçare për të degraduar financimin ushtarak të Moskës që nga pushtimi i Ukrainës në vitin 2022. Megjithatë, siç paralajmëroi Ministri i Jashtëm lituanez Kęstutis Budrys, negociatat dominohen gjithnjë e më shumë nga shqetësimet e brendshme tregtare sesa nga qëllimet strategjike gjeopolitike.
Bloomberg vuri në dukje se presidenca irlandeze e BE-së ka planifikuar një takim urgjent të ambasadorëve për të thyer bllokimin mbi Raiffeisen dhe LNG-në, duke shpresuar të shpëtojë paketën para se të skadojë afati i kufizimit të çmimit të naftës. /Kapitali.al