Raiffeisen Bank paralajmëron për SMS mashtruese, u bën thirrje klientëve të mos ndajnë të dhënat bankare
Raiffeisen Bank ka njoftuar se ditët e fundit janë raportuar mesazhe SMS mashtruese që synojnë të mashtrojnë klientët dhe të sigurojnë të dhënat e tyre bankare për përdorim të paautorizuar.
Sipas bankës, mesazhet përmbajnë lidhje të dyshimta që u kërkojnë përdoruesve të “konfirmojnë” ose “verifikojnë” informacionet e tyre, shoqëruar shpesh me kërcënime për mbylljen e llogarisë ose me premtime për shpërblime dhe dhurata të rreme.
Raiffeisen Bank u bën thirrje klientëve të mos klikojnë në asnjë link të dyshimtë, të mos ndajnë të dhënat personale, kodet njëpërdorimshe apo informacionet e kartave bankare. Banka rekomandon që adresa zyrtare të shkruhet gjithmonë manualisht në shfletues dhe jo të hapet përmes lidhjeve të dërguara me SMS.
Klientët që kanë klikuar në lidhje të dyshimta ose kanë ndarë informacionet e tyre këshillohen të kontaktojnë menjëherë Qendrën e Kontaktit të Raiffeisen Bank në numrin 042 381 381, për të marrë masat e nevojshme për mbrojtjen e llogarive të tyre.