Kush e nxorri nga Proncipote në Ksamil autorin e vrasjes së turistit? Shoqërohen i gjithë stafi i resortit
KSAMIL Pushimet në Ksamil do të ishin të fundit për turistin francez 20-vjeçar, Migel Mendes, i cili u vra me thikë mëngjesin e sotëm pas një konflikti në kompleksin “Principote”.
Sipas të dhënave të deritanishme, konflikti dyshohet se nisi mbrëmjen e së hënës në klubin e natës “La Guerre”, ku Mendes ndodhej së bashku me miqtë e tij në një festë me DJ francez. Përplasja më pas u përshkallëzua me truprojën e kompleksit, 29-vjeçarin Sokrat Vata.
Mësohet se Vata e ka nxjerrë turistin nga ambientet e lokalit, në pjesën e jashtme pas beach bar-it dhe shezlongëve, ku dyshohet se e ka goditur me thikë. Pas ngjarjes, autori është larguar nga vendi i krimit.
Në kuadër të hetimeve, i gjithë stafi i “Principote” është shoqëruar dhe është marrë në pyetje nga policia. Hetuesit po verifikojnë jo vetëm rrethanat dhe dinamikën e konfliktit, por edhe nëse autori është ndihmuar nga persona të tjerë pas kryerjes së krimit, përfshirë mundësinë e ndihmës për t’u larguar nga zona. Po punohet për të përcaktuar se kush ka qenë në dijeni të ngjarjes dhe nëse dikush e ka ndihmuar autorin gjatë arratisjes.
Vata është arrestuar rreth pesë orë pas vrasjes në Levan të Fierit, teksa dyshohet se po përpiqej të largohej i fshehur në bagazhin e një automjeti. Në makinë ndodheshin një 31-vjeçare dhe një 38-vjeçar, shtetas turq, të cilët gjithashtu janë marrë në pyetje nga autoritetet për të sqaruar rrethanat e transportimit të tij.
29-vjeçari, banues në Has dhe i punësuar si truprojë në “Principote”, rezulton se kishte pasur më herët probleme me drejtësinë në Britaninë e Madhe. Sipas raportimeve, ai ishte dënuar në vitin 2024 për trafik droge. Rrethanat e lirimit të tij nga autoritetet britanike pritet të sqarohen gjatë hetimeve.
Ndërkohë, grupi hetimor, nën drejtimin e Prokurorisë, vijon punën për zbardhjen e plotë të ngjarjes tragjike. Krahas marrjes në pyetje të stafit dhe personave që ndodheshin në kompleks, autoritetet po verifikojnë kamerat e sigurisë, lëvizjet e autorit pas krimit dhe personat me të cilët ai ka pasur kontakt deri në momentin e arrestimit.
Ngjarja ka shkaktuar tronditje edhe te pushuesit në Ksamil.
“Është një ngjarje e rëndë, jemi me pushime me fëmijët! Si t’u themi që është vrarë dikush? Ata do të tremben”, tha një prej pushuesve.
“Principote” është një kompleks luksoz buzë detit në Rivierën Shqiptare, përballë Tre Ishujve, me plazh privat, restorant, bar dhe ambiente relaksi. Ngjarja e rëndë ka tronditur një prej zonave më të frekuentuara turistike të jugut gjatë sezonit veror.