Prokuroria e Posaçme Kundër Korrupsionit dhe Krimit të Organizuar (SPAK) ka hapur një hetim zyrtar mbi mënyrën se si u hoq gjoba rekord prej 120 milionë euro ndaj kompanisë Bankers Petroleum. Sipas burimeve të “Kapitali”, SPAK ka sekuestruar dokumentacionin zyrtar nga Ministria e Financave dhe Drejtoria e Përgjithshme e Doganave, të lidhur me procesin e pezullimit dhe moszbatimit të kësaj gjobe.
Pse u vendos gjoba 120 milionë euro?
Gjoba u vendos në vitin 2019 nga Dogana e Fierit, pas një hetimi dyvjeçar të Drejtorisë së përgjithshme të Doganave. Hetimi pretendonte se Bankers Petroleum kishte shmangur rreth 30 milionë euro akcizë, duke përdorur solarin e prodhuar nga ARMO në rafinerinë e Ballshit.
Sipas ligjit, përveç detyrimit bazë aplikohet edhe një gjobë trefish, duke e çuar totalin në 120 milionë euro.
Si u pezullua gjoba?
Pas njoftimit të gjobës, Bankers Petroleum kërkoi ndërhyrjen e Ministrisë së Infrastrukturës dhe Energjisë, duke pretenduar se gjoba ishte e paligjshme dhe se kompanisë nuk i takonte të paguante akcizën për holluesin.
Ministrja e atëhershme e Financave, Anila Denaj, urdhëroi pezullimin e përkohshëm të gjobës derisa çështja të konsultohej me Avokaturën e Shtetit, për të shmangur mundësinë e një arbitrazhi ndërkombëtar.
Pse është ngritur dyshimi për shkelje?
Ligji shqiptar kërkon që një vendim përfundimtar i një gjobe administrative të merret brenda 6 muajve. Por gjoba ndaj Bankers Petroleum u mbajt pezull për pothuajse 7 vite, pa një vendim përfundimtar.
Vetëm një muaj më parë, Dogana e Fierit e riaktivizoi gjobën, duke i dhënë fund pezullimit shumëvjeçar – në një moment kur çështja ishte bërë publike dhe po hetohej nga organet ligjzbatuese.
A ka pasur ndërhyrje nga drejtuesit e doganave?
Raportime të mëparshme të Skyweb.al tregojnë se ish-kreu i Doganës së Fierit, Olti Kuke, i ka dërguar disa herë njoftime kreut të Doganave, Genti Gazheli, gjatë vitit 2021, duke e informuar për afatet ligjore dhe nevojën për ta procesuar gjobën. Por, sipas këtyre dokumenteve, Gazheli nuk ka ndërmarrë asnjë veprim.
Vetëm pasi çështja u publikua gjerësisht dhe Prokuroria e Fierit ia referoi dosjen SPAK-ut, Drejtoria e Doganave është përpjekur të rikthejë gjobën për shqyrtim – disa vite me vonesë.
Pse është e rëndësishme kjo çështje?
Çështja e gjobës së Bankers Petroleum konsiderohet një nga ngjarjet më serioze në historinë e administratës fiskale shqiptare, për shkak të:
- Shumës rekord të gjobës: 120 milionë euro
- Dyshimeve për pezullim të paligjshëm
- Korrenspondencës së zgjatur për 7 vite pa vendim
- Mundësisë që shteti shqiptar të ketë pësuar dëm ekonomik
- Hetimeve aktuale të SPAK mbi përgjegjësitë institucionale
