Keni shënimin ”PP” në Pasaportë? Mos u shqetësoni…ja kuptimi i saj
Pse pasaportat e reja shqiptare mbajnë kodin “PP”? IdentiTek sqaron ndryshimin
Qytetarët shqiptarë që kanë marrë së fundmi pasaportën e re mund të kenë vënë re një ndryshim në dokumentin e tyre: shkronja “P” është zëvendësuar me kodin “PP”. Por ndryshe nga sa mund të jetë menduar, ky ndryshim nuk lidhet me ndonjë gabim në prodhim apo printim.
IdentiTek ka reaguar publikisht për të shpjeguar arsyen e këtij ndryshimi, duke bërë të ditur se bëhet fjalë për përshtatjen e pasaportave shqiptare me standardet e përditësuara ndërkombëtare të Organizatës Ndërkombëtare të Aviacionit Civil (ICAO).
Në mars të vitit 2024, ICAO miratoi ndryshime në standardet teknike për dokumentet e udhëtimit që lexohen nga sistemet automatike. Sipas këtyre rregullave, pasaportat e zakonshme duhet të identifikohen me kodin “PP”, në vend të shkronjës së vetme “P”. Ndryshim ka edhe për pasaportat e shërbimit, ku kodi i mëparshëm “PS” zëvendësohet me “PO”.
Shqipëria ka nisur zbatimin e formatit të ri që në dhjetor të vitit 2025, pra përpara afatit të vendosur nga organizata ndërkombëtare, më 1 janar 2026. Sipas kompanisë, deri tani janë prodhuar mbi 300 mijë pasaporta me kodet e reja.
Një tjetër hap në drejtim të sigurisë së dokumenteve të udhëtimit është edhe anëtarësimi i Shqipërisë, në mars të vitit 2025, në Drejtorinë Publike të Çelësave të ICAO-s (PKD).
Përmes këtij sistemi mundësohet verifikimi elektronik i autenticitetit të pasaportave biometrike dhe i informacionit të ruajtur në çipin e tyre. Kjo ndihmon në identifikimin e dokumenteve të falsifikuara dhe rrit besueshmërinë e tyre gjatë kontrolleve kufitare.
Pra, qytetarët nuk kanë arsye të shqetësohen nëse në pasaportën e tyre të re shohin shënimin “PP”. Ai është thjesht një kod i ri identifikimi, i vendosur në përputhje me standardet ndërkombëtare, dhe jo një shenjë e ndonjë problemi me dokumentin.

