INVESTIGIMI/ Raiffeisen Bank nën hetim, “Konkurenca”: Dyshohet se favorizoi SIGAL dhe zhvati qytetarët

“Raiffeisen Bank” një nga bankat me të mëdha në Shqipëri rezulton se ka abuzuar me kredimarrësit hipotekorë duke shkelur ligjin, pasi ka zgjedhur vetëm një kompani për Sigurimin e Jetës, duke sjellë dëme të Interesave të Klientëve.

Kjo rezulton nga një hetim i Autoriteti i Konkurrencës për mënyrën se si bankat e nivelit të dytë përzgjedhin kompanitë e sigurimit të jetës për klientët që marrin kredi hipotekore. Sikurse shumë qytetarë kredimarrës janë në dijeni, bankat e nivelit të dytë e kanë të detyrueshme sigurinë e jetës në rastin e një kredi hipotekore.

InfoNews, gjatë një hulumtimi të kryer në raportin që ka siguruar nga Autoriteti i Konkurrencës, rezulton se sjellja e ndërmarrjes “Banka Raiffeisen SHA” mund të përbëje shkelje te nenit 4 dhe nenit 9 te Ligjit nr. 9121, date 28.07.2003 “Per mbrojtjen e konkurrences”.

Nga shqyrtimi i dokumentacionit InfoNews mëson se për kreditë konsumatore, komisioni i aplikuar ndaj Sigal Life, si e vetmja shoqëri me të cilën banka Raiffeisen ka lidhur kontratë sigurimi për pagesën e këtij segmenti të kredisë, është 50% e primit të arkëtuar për “paketën e sigurimit standard” dhe 45% e primit të arkëtuar për “paketën e sigurimit ekstra”.

Duke pasur parasysh që gjatë periudhës hetimore janë prerë rreth 39,000 polica sigurimi për kredinë konsumatore pranë Sigal Life, si e vetmja shoqëri sigurimi me të cilën banka Raiffeisen ka lidhur kontratë për këtë segment të kredisë, Sigal Life dominon 90% të tregut të sigurimit të jetës për të gjitha llojet e kredisë pranë bankës Raiffeisen.

Nga të dhënat vihet re se banka Raiffeisen ka arkëtuar të ardhurat më të larta nga komisionet e marra prej Sigal Life.

Në konkluzion, banka Raiffeisen SHA, për segmentin e kredisë konsumatore, banka ka lidhur kontratë me një kompani të vetme sigurimi që është Sigal Life, pranë së cilës prehet çdo policë e sigurimit të jetës, duke kufizuar zgjedhjet e klientëve dhe për rrjedhojë konkurrencën në këtë treg.

Sa më sipër, sjellja e ndërmarrjes Banka Raiffeisen SHA në tregun përkatës mund të përbëjë shkelje të nenit 4 dhe nenit 9 të Ligjit nr. 9121, datë 28.07.2003 “Për mbrojtjen e konkurrencës”.

Në kuadër të këtij procesi, Autoriteti i Konkurrencës fton çdo kredimarrës që ka marrë kredi dhe ka paguar në lidhje me sigurimin e jetës për kredinë, të japë me dëshirë informacion dhe dëshmi mbi eksperiencën e tyre. Në mënyrë të veçantë, kërkohet që kredimarrësit të informojnë Autoritetin për çdo rast kur:

-nuk u është dhënë mundësia të zgjedhin lirisht shoqërinë e sigurimit të jetës, apo;

-vlerësojnë se kanë pasur pengesa apo detyrime të imponuara nga bankat lidhur me këtë zgjedhje./InfoNews.al

©Copyright InfoNews.al
Ky artikull është ekskluziv i InfoNews.al, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar InfoNews.al dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.