Gjirofarm qumështi serb me etiketë shqiptare!
Një produkt që konsumatorët shqiptarë e lidhin instinktivisht me fermat e jugut dhe qumështin vendas, rezulton të ketë origjinë prodhimi në Serbia.
Bëhet fjalë për qumështin e kompanisë Gjirofarm, i cili mban bar kod shqiptar por në ambalazh shkruhet se është prodhuar nga “AD IMLEK”.Një verifikim i thjeshtë tregon se “Imlek” është një nga kompanitë më të mëdha të industrisë së qumështit në Serbi.
Teksa konsumatori sheh emrin “Gjirofarm” dhe mendon për qumësht të mbledhur nga zonat rurale shqiptare, produkti në fakt rezulton të jetë prodhim serb, i paketuar nën markën shqiptare.
Edhe pse identiteti vizual mund të krijojë perceptimin e qumështit vendas, origjina e prodhimit ndodhet jashtë Shqiperisë.
Teksa fermerët shqiptarë raportojnë ulje të prodhimit të qumështit, rritje të kostove dhe mbyllje fermash, në treg po shtohen produktet me markë shqiptare, por me origjinë prodhimi nga jashtë.
Kjo situatë ngre një tjetër pikëpyetje të fortë: A po zëvendësohet gradualisht qumështi i fermerëve shqiptarë me import?Mes rritjes së importeve dhe vështirësive të prodhuesve vendas, sfida për ushqimin “made in Albania” bëhet gjithnjë e më e fortë.