“Inspektori nuk do zgjedhë më kë të kontrollojë”, Sula: Brenda marsit 2027 vendos sistemi, inspektorët do të pajisen me kamera

Inspektorati i Përgjithshëm do të ndryshojë mënyrën e kryerjes së kontrolleve ndaj bizneseve. Në një tryezë dialogu me përfaqësues të biznesit, Inspektori i Përgjithshëm Dashnor Sula deklaroi se brenda marsit 2027 subjektet që do të inspektohen nuk do të përzgjidhen më nga inspektorët, por nga sistemi online e-Inspektimi, bazuar në indikatorët e riskut.

Sula bëri të ditur gjithashtu se brenda një muaji nga krijimi i platformës Sigurt.gov.al janë depozituar rreth 50 denoncime nga biznese dhe qytetarë, të cilat sipas tij do të verifikohen me rigorozitet. Një tjetër masë është pajisja e inspektorëve me kamera trupi, me synimin për të monitoruar veprimtarinë e tyre gjatë gjithë orarit të punës.

“Kush zbaton ligjin drejt do të qëndrojë; të tjerët nuk kanë vend në inspektorate”, deklaroi Sula, duke paralajmëruar masa ndaj inspektorëve kur konstatohet shkelje e ligjit apo vendime të padrejta ndaj bizneseve.

Në takim, përfaqësuesit e biznesit ngritën shqetësime për kontrollet e përsëritura dhe kërkuan kalimin nga një kulturë e orientuar drejt gjobave në një qasje më parandaluese dhe këshilluese. Sula tha se synimi është që bizneset që respektojnë ligjin të trajtohen si aleatë, ndërsa kontrollet të fokusohen te subjektet me nivel më të lartë risku.