Atentati që i mori jetën Gilmando Dani dhe plagosi shoqëruesin e tij Muçi Shaljani, i cili humbi jetën katër ditë më pas në Spitalin e Traumës për shkak të plagëve të marra, ishte një nga ngjarjet më të bujshëm të kohëve të fundit, që tronditi opinioni publik dhe jo vetëm, lidhur me faktin që masakra ndodhi pranë aeroportit të Rinasit, aty ku duhet të ishte një nga zonat më të sigurta.
Pa gabuar pavarësisht aftësisë që tregoi drejtuesi i automjetit për ta devijuar makinën në një kënd larg togës së qitësve që duket se ishin pajisur me urdhërin e qartë të vdekjes, atë që objektivi nuk duhet të dilte i gjallë nga makina.
Ashtu sikurse bënë dhe u pa edhe në pamjet filmike’, ku pavarësisht zhvillimit të shpejtë të dinamikës së ngjarjes, autorët morën gjithë kohën e duhur për t’u afruar edhe njëherë dhe për ta qëlluar në kokë, gjahun e tyre.
Sikurse rezultoi edhe autopsia mjeko-ligjore, ku njëri nga plumbat e kishte marrë në kokë Gilmando Danin, personazh, që kishte bërë histori në botën e krimit shqiptar dhe njihej si një nga eksponentët më të ngushtë të Emiljano Shullazit, madje deri aty sa cilësohej si krahu i tij i djathtë.
Gilmando Dani i kishte shpëtuar edhe dy atentateve të mëparshme, ne vitin 2011 dhe 2015,
por që këtë herë nuk mundi t’u shmanget plumbave të shumtë që u derdhën ndaj makinës me të cilën ai udhëtonte, bashkë me mikun e tij, efektivin e policisë, Muçi Shaljani, alias Mustafa Sheqeri, i cili ndërsa doli i gjallë nga makina, humbi jetën, katër ditë më pas, mëngjesin e datës 15 nëntor në spitalin e Traumës në Tiranë, pasi kishte marrë 8 plumba në trup dhe dy në kokë.
Muçi Shaljani, Agjent në Agjencinë e Mbikqyrjes Policore, detyra e të cilit pavarësisht se ishte të ndjekë dhe të survejojë policët që janë në shkelje të ligjit, apo që kanë kontakte të papërshtatshme me elementë kriminalë, këtë ditë të atentatit ndaj makinës me të cilën ai lëvizte, ishte në shoqërinë e një prej kontigjentëve më të rrezikshëm kriminalë në Shqipëri gjë që me siguri ai duhet ta dinte. Gilmando Dani nuk ishte një emër që i përkiste krimit ordiner, por një bande që ishte marrë me kërcënime, gjobvënie deri edhe vrasje.
Por si ranë në pritë 47- vjeçari Gilmando Dani dhe agjenti i AMP-së, 42 vjeçari, Muçi Shaljani.
Cili ishte itinerari i tyre i përbashkët, dhe kush kishte informacion mbi lëvizjet e tyre?
U tradhtuan nga brenda grupit, apo nga strukturat e inkriminuara të policisë?
Një krim i cili ka cënuar rëndë jo vetëm rendin publik por edhe sigurinë kombëtare.
Kjo, sepse ndodhi pikërisht në një nga pikat më strategjike të vendit.
Në Aeroportin e Rinasit, që mendohet të jetë jo vetëm më i survejuari, por edhe më i mbrojturi përsa i përket elementëve të sigurisë.
Por çuditërisht në këtë ditë rrugët rreth tij ishin më të braktisurat nga efektivët e policisë.
Ndërkohë që ajo që duket edhe më absurde është fakti se siguria publike në këtë perimetër i është lënë në dorë komisariatit të vogël të Krujës, rreth 17 km larg nga aeroporti, komisariat që u njoftua i pari në lidhje me ngjarjen.
Dhe më absurde është po të mendosh që ndërsa makinat e policisë vinin nga Kruja, ato duhet të jenë shkëmbyer rrugës me atë të vrasësve, të cilët zgjodhën pikërisht zonën e Fushe Krujës për të djegur automjetin dhe armët e përdorura në krim.
“Më datë 11 Nëntor 2025, Salla Operative e Policisë Krujë, ka marrë njoftim se në vendin e quajtur rrethrrotullimi i Rinasit, persona të paindentifikuar kanë qëlluar me armë zjarri në drejtim të një automjeti me targa AB 099 UO, brenda të cilit ndodheshin të dëmtuar rëndë dy persona, konkretisht Gilmando Dani 47 vjeç dhe Muçi Shaljani, alias Mustafa Sheqeri, 42 vjeç”, thuhet në dosjen hetimore.
Edhe pse në fillim ishte e paqartë dinamika e lëvizjes së dy personazheve të rënë pre e këtij atentati, ku lajmet e para që qarkulluan ishin se Muçi Shaljani e kishte pritur jashtë aeroportit mikun e tij Gilmando Dani, që sipas informacioneve sapo kishte zbritur nga një fluturim që vinte nga Spanja, shpejt grupi hetues mundi të zbulojë lëvizjen e përbashkët të tyre.
Gilmando Dani dhe Muçi Shaljani që doli se kishin udhëtuar së bashku drejt vendit iberik, dhe më konkretisht drejt Barcelonës, dhe po së bashku ishin kthyer nga aty më datë 11 Nëntor rreth mesditës.
Një odise që ndodh rëndom me linjat e fluturimit loë coast, që i kishte ndjekur edhe ata, të cilët ndërsa duhet të zbrisnin një ditë më herët në Rinas, fluturimi ishte anuluar dhe për pasojë u ishte dashur të ktheheshin në Shqipëri, një ditë më vonë nga data në biletën e kthimit.
Pra më datë 11 Nëntor, dita kur ranë edhe në plumbat e togës së pushkatimit që i priste jashtë perimetrit të aeroportit, mesa duket me informacione shumë të sakta, mbi lëvizjet e viktimave të tyre të ardhshme.
“Më datë 11 Nëntor 2025, Gilmando Dani dhe Muçi Shaljani, alias Mustafa Sheqeri, rezulton se kanë udhëtuar së bashku me avion nga Barcelona/Spanjë në drejtim të Tiranës. Dhe pasi kanë zbritur në Aeroportin ‘Nënë Tereza’, Rinas, ata kanë hipur dhe udhëtuar po së bashku në automjetin e markës ‘Mercedes Benz’ me targa AB 099 UO, që ndodhej i parkuar në parkingun e jashtëm, brenda rrethimit të Aeroportit”, thuhet në dosje.
Ajo që është ende e paqartë, është nëse grupi i ekzekutorëve kishte apo jo një informator të vetin brenda aeroportit, por saktësia e informacionit që ata kanë për lëvizjet e objektivit të tyre, duket të jetë mbresëlënëse.
Gjë që vihet re edhe në lëvizjet e tyre, të cilat duken gati të automatizuara dhe nuk lënë asnjë shteg apo hamendësim për gabime, të cilat nuk duhet të përsëriteshin, ashtu sikurse kishte ndodhur në dy atentatet e mëparshme ndaj Gilmando Danit.
Në njërin prej tyre, atë të Qafës së Kasharit. ai kishte qenë në praninë e Emiljano Shullazit.
Në atentatin e fundit i gjithë përpilimi i aktit final, atij të ekzekutimit të Gilmando Danit, ndodh në harkun kohor të tri minutave, nga dalja e makinës me të cilën ai udhëton nga parkingu i jashtëm i aeroportit deri në rrethin e parë jashtë terminalit, ku po e presin qitësit.
“Pasi makina ku udhëtonin Gilmando Dani dhe Muçi Shaljani, ka dalë nga parkingu i jashtëm i aeroportit ku ishte parkuar për disa ditë, në orën 14.15 min automjeti ka vazhduar lëvizjen në drejtim të rrethrrotullimit të Rinasit”, thuhet në dosjen hetimore.