Gjashtë makina policie dhe dhjetëra efektivë, të shoqëruar nga zyrtarë të Inspektoratit Kombëtar të Mbrojtjes së Territorit (IKMT), zbarkuan ne zonën e Saukut, rreth katër kilometra nga qendra e Tiranës.
Efektivët e policisë rrethuan perimetrin e zonës, ndërsa punonjës të IKMT-së kontrolluan ambientet e tre godinave të blinduara, të cilat dyshohet se janë ndërtuar në mënyrë të paligjshme.
Forcat e Inspektoratit Kombëtar të Mbrojtjes së Territorit nisën shembjen e disa vilave, që siç thotë policia janë ndërtuar pa leje.
Sipas të dhënave zyrtare, 14 persona janë nën hetim, përfshirë zyrtarë të IKMT-së, inxhinierë, arkitektë dhe administratorë të subjekteve private, të cilët dyshohet se kanë qenë të përfshirë në realizimin e këtyre ndërtesave.
Nga hetimet e deritanishme, pesë inspektorë të IMT-së së Tiranës janë arrestuar, ndërsa tre të tjerë janë shpallur në kërkim. Një punonjës tjetër i IKMT-së po hetohet për shpërdorim detyre.
Operacioni, i udhëhequr nga specialistët e seksionit për Hetimin e Krimeve Ekonomiko-Financiare, identifikoi tre raste ndërtimi të paligjshëm në zonën rezidenciale të Saukut dhe çoi në arrestimin e dy personave të tjerë si drejtuesi teknik dhe inxhinierit të ndërtesave.
Ndërkohë, dy bashkëadministratorë dhe arkitektja e njërit prej subjekteve janë shpallur në kërkim.
Policia njofton se vijojnë kërkimet për gjashtë persona të tjerë dhe po mblidhen prova mbi mënyrën e dhënies së lejeve për ndërtim në tokë publike në shkelje të ligjit.
Nga ana tjetër, kompania ndërtuese “Austrian Construction Albania” sh.p.k ka kundërshtuar vendimin për shembje, duke pretenduar se ndërtimet në pronësi të Vladimir Kosta, Dhurata Bogdani, Shpëtim dhe Enver Gjuzi janë kryer pas marrjes së lejes nga kryebashkiaku i Tiranës, Erion Veliaj, më 23 prill 2021.
Sipas dokumenteve të protokolluara në Bashkinë e Tiranës, leja përfshinte ndërtimin e një kompleksi rezidencial me vila trekatëshe mbi tokë dhe dy kate nëntokë, përfshirë 555.8 metra katrorë për banesa sociale, me afat përfundimi 48 muaj, që ka përfunduar në prill 2025.
Ndërkohë, nga 33 vilat e parashikuara, janë ndërtuar 31, ndërsa dy të tjera mbeten pezull. Përfaqësuesit ligjorë të kompanisë paralajmërojnë ankimin e vendimit për shembje, duke argumentuar se çdo procedurë është kryer “në përputhje me autorizimet bashkiake”.
Të dhënat e siguruara nga “shteg.org” tregojnë se në qarkun e Tiranës, gjatë periudhës 2016–2024, janë dhënë pesë leje ndërtimi për objekte multifunksionale, përfshirë hotele dhe resorte.
Sipas të dhënave të “shteg.org”, gjatë 12 viteve të fundit volumi i ndërtimit bazuar në lejet e dhëna ka arritur 12.3 milionë metra katrorë, ku 9.2 milionë, ose 75%, janë përfituar vetëm nga qarku i Tiranës.
Prokuroria e Tiranës njofton se gjatë 10-vjeçarit të fundit janë regjistruar 1,457 procedime penale për ndërtime të paligjshme.
Ndërtimet pa leje të rregullta kanë zbuluar një skemë të gjerë abuzimesh dhe korrupsioni, ku rezulton përfshirja e funksionarëve publikë në nivele të larta korrupsioni.