Vidhen të dhënat e klientëve të ProCredit Bank Albania? Institicioni: Ja e vërteta…
Pretendime të publikuara online kanë ngritur shqetësime për një sulm të mundshëm ndaj të dhënave që lidhen me ProCredit Bank Albania, duke pretenduar se një sasi e madhe informacioni mund të jetë komprometuar dhe do të hidhej në tregun online.
Në publikimet që qarkullojnë në internet pretendohet për një “paketë” me rreth 2 TB të dhëna, ku përfshihen regjistra klientësh, histori transaksionesh, komunikime dhe të dhëna identifikimi (KYC), të cilat pretendohet se lidhen me operacione call center në Shqipëri.
Çfarë po ndodh me ProCredit Bank Albania? Humbje me 78% në vitin 2025
Megjithatë, deri në këtë moment, këto pretendime nuk janë shoqëruar me prova publike që të konfirmojnë një sulm ndaj sistemeve të ProCredit Bank Albania apo një rrjedhje të të dhënave të klientëve të saj.
Pas interesimit të Maska.al për këto pretendime që po qarkullojnë online, ProCredit Bank Albania ka reaguar zyrtarisht, duke mohuar kategorikisht që të ketë pasur një incident sigurie apo komprometim të informacionit të administruar nga banka.
Pasi ra gropë, BERZH i ofron 10 milionë euro kredi Bankës ProCredit në Shqipëri
“ProCredit Bank Albania është në dijeni të referencave të bëra ndaj bankës në publikimet që ju përmendni. Pas verifikimeve të kryera, dëshirojmë të sqarojmë se këto referenca nuk bazohen në fakte që lidhen me aktivitetin apo operacionet e bankës”, thuhet në përgjigjen e bankës për Maska.al.
Banka thekson se nuk ka konstatuar asnjë cenim të sistemeve të saj teknologjike dhe se të dhënat e klientëve vijojnë të jenë të mbrojtura.
“Banka nuk ka pësuar asnjë incident të sigurisë kibernetike dhe nuk ka konstatuar asnjë komprometim të sistemeve, të dhënave apo shërbimeve të saj. Gjithashtu, nuk ekziston asnjë evidencë që të mbështesë pretendime për akses të paautorizuar apo komprometim të të dhënave të klientëve ose të informacionit të administruar nga banka”, deklaron ProCredit Bank Albania.
Sipas bankës, infrastruktura teknologjike monitorohet në mënyrë të vazhdueshme dhe zbatohen standarde të avancuara të sigurisë së informacionit për garantimin e mbrojtjes së të dhënave, fondeve dhe interesave të klientëve.
“Siguria e informacionit, integriteti operacional dhe besimi i klientëve mbeten ndër prioritetet tona kryesore. Aktiviteti i bankës vijon normalisht dhe klientët tanë mund të kenë besim të plotë në sigurinë e shërbimeve që ne ofrojmë”, thuhet më tej në reagimin zyrtar.
Deri tani, nuk ka një konfirmim nga autoritetet përgjegjëse për një sulm kibernetik ndaj ProCredit Bank Albania, ndërsa pretendimet e shpërndara në internet mbeten të pakonfirmuara.
Maska.al do të vijojë të monitorojë situatën dhe do të raportojë çdo zhvillim të ri që lidhet me këtë çështje.
