Skandali i parave të pensionistëve në Durrës, Mataj kërkon lirinë
Posta Shqiptare në Durrës, hetimi kalon në GJKKO! Dyshimet për një skemë më të madhe se 700 mijë euro
Çështja e zhdukjes së afro 700 mijë eurove nga fondet e pensioneve dhe ndihmës sociale në filialin e Postës Shqiptare në Durrës merr një zhvillim të ri. Ish-drejtoresha e këtij filiali, Elisabeta Mataj, ka kërkuar zëvendësimin e masës së sigurisë, por Gjykata e Durrësit ka shpallur moskompetencën lëndore, duke vendosur kalimin e akteve në Gjykatën e Posaçme kundër Korrupsionit dhe Krimit të Organizuar (GJKKO).
Sipas raportimeve, avokatët e Matajt kanë pretenduar se nuk janë njoftuar zyrtarisht për vendimin e moskompetencës. Ata kanë bërë me dije se do të kërkojnë aktin përkatës gjatë seancës së informimit dymujor, të planifikuar për të premten në Gjykatën e Durrësit.
Elisabeta Mataj është nën hetim për dyshimet mbi përfshirjen në vjedhjen e fondeve që ishin parashikuar për pagesën e pensioneve dhe ndihmës sociale. Bëhet fjalë për rreth 700 mijë euro, të cilat dyshohet se janë përvetësuar gjatë muajve prill-maj 2026.
Ndërkohë, hetimi i SPAK ka marrë një tjetër drejtim. Përveç veprës penale të “vjedhjes duke shpërdoruar detyrën”, hetuesit kanë shtuar edhe dyshimet për veprën penale të “grupit të strukturuar kriminal”.
Në këtë dosje janë nën hetim edhe ish-shefja e financës, Valbona Duni, si dhe ish-arkëtarja Paola Dana. Çështja fillimisht u hetua nga Prokuroria e Durrësit, por pas dyshimeve për përfshirjen e një grupi të strukturuar kriminal, dosja iu përcoll SPAK-ut.
Pas afro pesë muajsh hetime, dyshimet janë zgjeruar përtej episodit fillestar të vjedhjes. Sipas burimeve pranë hetimit, ekziston dyshimi se skema mund të jetë shtrirë në një periudhë më të gjatë dhe se vlera e përvetësuar mund të jetë më e madhe se 700 mijë eurot e konstatuara fillimisht.
Hetuesit po verifikojnë gjithashtu dyshimet për manovra financiare me paratë e pensioneve dhe ndihmës sociale, të cilat dyshohet se janë hedhur në qarkullim me synimin për të përfituar interesa.
Zgjerimi i hetimeve mund të çojë edhe në verifikimin e veprimeve të kryera gjatë drejtimit të mëparshëm të filialit, përfshirë periudhën kur në krye të tij ishte Etleva Budini, aktualisht deputete e Kuvendit të Shqipërisë. Deri më tani, ky është një pistë që raportohet se mund të shqyrtohet nga hetuesit dhe nuk përbën konstatim përgjegjësie penale.
Aktualisht, Elisabeta Mataj, Valbona Duni dhe Paola Dana po hetohen në masën e sigurisë “arrest në shtëpi”. Në ditët në vijim pritet të dalin përpara GJKKO-së për verifikimin e masave të sigurisë.

