Drejtoria e Përgjithshme e Policisë së Shtetit ka shpallur përfundimisht fituesin e tenderit për furnizimin me pajisje policore. Kompania MSSC, në pronësi të biznesmenit Emiljano Dusha, është shpallur fituese me një ofertë prej 50.3 milionë lekësh, ose 91% të fondit limit të përcaktuar për këtë procedurë.
Sipas dokumenteve të siguruara nga Skyweb.al, në këtë tender nuk ka pasur asnjë ankesë dhe MSSC ka qenë i vetmi ofertues, duke e fituar procedurën pa konkurrencë.
Ky është një tjetër kontratë në listën e gjatë të tenderëve që Dusha ka fituar ndër vite me institucionet ligjzbatuese në vend, përfshirë armatime, pajisje speciale dhe furnizime të klasifikuara, shpesh nëpërmjet procedurave të drejtpërdrejta dhe në një raport të theksuar preferencial.
Tenderi ishte shpallur për herë të parë në prill 2025, por pas disa shtyrjesh dhe anulimesh, për arsye që nuk janë bërë publike, kontrata u lidh këtë javë me MSSC-në, që ka ndërtuar një histori të gjatë bashkëpunimi me Policinë e Shtetit.
Emiljano Dusha, për të cilin opozita ka dorëzuar më herët kallëzim penal në SPAK për blerje votash në shërbim të Partisë Socialiste, ka rritur ndjeshëm ndikimin në tregun e furnizimeve me armatime dhe pajisje sigurie që pas vitit 2013.
Në vitin 2023, kompania e tij raportoi një fitim neto prej 822 milionë lekësh (8.2 milionë euro), kryesisht nga kontrata të lidhura me ushtrinë dhe policinë.
Më parë, MSSC ka përfituar edhe një tender sekret prej 30 milionë eurosh për furnizimin e ushtrisë me armë, një kontratë e dhënë përmes negociatave të drejtpërdrejta pa shpallje publike.
Përtej dominimit të tij në këtë sektor, fakti që në tenderin aktual nuk mori pjesë asnjë kompani tjetër, ndonëse në treg veprojnë të paktën 3-4 subjekte të profilizuara në këtë fushë – ka ngjallur dyshime për mungesë të konkurrencës reale dhe ndarje të paracaktuar të kontratave.
Sipas burimeve të brendshme, këto kompani “e kanë ndarë tregun” mes tyre në tenderë të ndryshëm, duke shmangur përplasjet direkte.
Kontrata e re me Policinë e Shtetit duket se konsolidon më tej pozicionin dominues të MSSC-së në tregun e sigurisë dhe armatimit, ndërkohë që mekanizmat e kontrollit të konkurrencës në prokurime mbeten të paefektshëm. /skyweb.al
