SPAK ka goditur ditën e sotme një tjetër organizatë kriminale, e cila dyshohet se merrej me trafikun e kokainës nga Amerika Latine drejt vendeve të Evropës Perëndimore.
Një nga personat e shpallur në kërkim është Fadil Balla, i njohur edhe me identitetin alias Jul Balla. Ai është pronari i resortit luksoz “Ajman Park” në qytetin e Shijakut, i cili është sekuestruar në kuadër të këtij operacioni të gjerë antidrogë.
Përveç aktivitetit në sektorin e turizmit, Fadil Balla rezulton të jetë gjithashtu administrator i kompanisë “AMR sh.p.k”, një subjekt i përfshirë në mënyrë të dyshimtë në përfitimin e tenderëve publikë nga Bashkia e Shijakut. Kompania ka përfituar tri kontrata publike, me një vlerë totale prej rreth 1.7 milionë eurosh dhe në të treja pa pasur konkurrentë të tjerë në garë.
Në vitin 2020, “AMR sh.p.k” fitoi tenderin me objekt “Shërbim pastrimi, gjelbërimi dhe mirëmbajtje të varrezave”, me vlerë 317 milionë lekë të vjetra. Kompania ishte e vetmja pjesëmarrëse dhe u shpall fituese me një ofertë sa 97% e fondit limit.
Në vitin 2022, i njëjti subjekt fitoi një tjetër tender me të njëjtin objekt dhe në të njëjtin institucion, kësaj here me vlerë 309 milionë lekë të vjetra. Sërish, nuk pati konkurrencë dhe oferta e paraqitur ishte sa 98.8% e fondit limit.
Në prill 2025, kompania përfitoi kontratën më të madhe nga Bashkia Shijak, tenderin me vlerë 1.2 miliardë lekë të vjetra, për “Pastrimin, grumbullimin dhe depozitimin e mbetjeve urbane, mirëmbajtjen e hapësirave publike dhe varrezave”. Edhe këtë herë, “AMR sh.p.k” ishte e vetmja në garë dhe fitoi me ofertën sa 99.6% të fondit limit.
Pra, Fadil Balla nuk ka pasur sukses vetëm në tregtinë e kokainës dhe superbiznesve që ka ngritur, por edhe në përfitimin e parasë publike përmes tenderave.
Megjithatë, ky është rasti i radhës në Shqipëri se si figura të krimit të organizuar operojnë në dy botë. Në njërën, trafikantë të fuqishëm me lidhje ndërkombëtare, në tjetrën sipërmarrës që përfitojnë nga fondet publike.
