Nga lidhja Rama-Yefet te takimi në Monako/ Si ngrihet “skema KAYO” sipas Ahmetajt

Ish-zëvendëskryeministri Arben Ahmetaj ka publikuar një audiopërgjim të cilin pretendon se përbën dëshmi për një skemë të gjerë abuzimi me fondet publike, asetet shtetërore dhe trafikun ndërkombëtar të armëve.

Në intervistën e dhënë nga Zvicra për gazetarin Çim Peka, Ahmetaj e vendosi në qendër të denoncimeve biznesmenin Ron Yefet, kompaninë Timak Defense dhe atë që ai e cilësoi si “koncepti KAYO”.

Sipas Ahmetajt, audiopërgjimi është regjistruar në janar të vitit 2026 dhe përfshin biseda që, sipas tij, lidhen me persona dhe kompani të përfshira në sektorin e mbrojtjes dhe në marrëdhëniet me institucionet shtetërore.

Ahmetaj pretendoi se Ron Yefet, të cilin e përshkroi si shtetas amerikano-izraelit dhe shqiptar, zotëron 49% të kompanisë Timak sh.p.k., ndërsa kjo e fundit, sipas tij, ka në pronësi 80% të Timak Defense. Pjesa tjetër prej 20% e Timak Defense, sipas deklarimit të tij, zotërohet nga KAYO.

Ish-zëvendëskryeministri e lidhi këtë strukturë me atë që e quajti “koncepti KAYO”, duke pretenduar se një skemë e tillë është shtrirë në sektorë të ndryshëm financiarë të shtetit.Në vijim të intervistës, Ahmetaj përmendi edhe kompani të tjera, mes tyre Advanced Arms Technology, Timak Aviation dhe Timak Special Vehicles. Ai hodhi gjithashtu akuza për lidhje të dyshuara me trafik ndërkombëtar armësh, duke përmendur emra të ndryshëm biznesmenësh dhe zyrtarësh.

Ahmetaj bëri edhe pretendime të forta ndaj drejtimit politik të vendit, duke iu referuar Edi Ramës me termin “kreu i organizatës” dhe duke pretenduar se ai qëndron në qendër të skemës që ai denoncon.

Gjatë intervistës, gazetari Çim Peka e pyeti për autenticitetin e materialit, ndërsa Ahmetaj deklaroi se audiopërgjimi mund t’i nënshtrohet ekspertizave nga specialistë të fushës.

Ai paralajmëroi gjithashtu publikimin e materialeve të tjera, duke përmendur një tjetër interceptim disaorësh në Monako, për të cilin tha se do të bëhet pjesë e një tjetër denoncimi.

Pjesë nga intervista ekskluzive:

ÇIM PEKA: Jemi rikthyer në pjesën e dytë me Arben Ahmetajn, jemi live nga Zvicra. E kam prezantuar, po flitet shumë për dëshminë e re të cilën zoti Ahmetaj e posedon dhe ka marrë përsipër ta bëjë publike.

Bëhet fjalë për një audiopërgjim. Ahmetaj, nuk dua t’ju pyes siç pyesin çdo gazetar në Shqipëri çfarë do bëjë e çfarë s’do bëjë, se kryesisht gazetarët e regjimit pyesin ‘nga e gjete’, por kjo nuk më intereson fare. Çfarë do të thotë për ju ky audiopërgjim?

ARBEN AHMETAJ: Mund të më pyesësh ku e gjeta, përgjigjja ime do të ishte që s’jam i autorizuar, po ju s’më pyetët, kështu që unë nuk po ju përgjigjem.

ÇIM PEKA: As nuk më duhet. Rëndësi ka që është autentik, nuk kontestohet dot.

ARBEN AHMETAJ: Mund të marrin qindra e qindra specialistë. Ka dhe një interceptim tjetër në Monako, tre orë, ku kreu i organizatës është kryefjala.

ÇIM PEKA: Domethënë bëhet fjalë për vazhdimin e…

ARBEN AHMETAJ: Jo për këtë sot, për vazhdimin. Sot do mjaftohemi tek e para. Këta personazhe kanë dhe një interceptim tjetër. Patjetër, dhe aty pastaj është një serial tjetër, film me krim të organizuar.

ÇIM PEKA: Pra, edhe unë si Beni po i drejtohem publikut. E kuptova që ka dhe gjashtë.

ARBEN AHMETAJ: Bëhet fjalë për audiopërgjimin, se s’dua t’i mbaj në suspensë askënd, se nuk është ky qëllimi. Bëhet fjalë për personazhin shumë të njohur në Shqipëri tashmë, amerikano-izraelito-shqiptarin Ron Yefet. Çfarë është Ron Yefet? Ron Yefet është parë në Shqipëri në vitin 2008 dhe ka një marrëdhënie të hershme me kreun e organizatës.

ÇIM PEKA: Është izraelit?

ARBEN AHMETAJ: Është amerikano-izraelit edhe shqiptar. Pra, i ka të treja pasaportat, mos gabohem, pastaj se s’kanë ndonjë vlerë. Është personi që unë kam denoncuar, që ka kërkuar kreu i organizatës t’i mbyllë borxhin e Shqipërisë. Ky është pikërisht personi që Ditmir Bushatit i është kërkuar t’i dorëzohet ambasada e Nju Jork-ut tonë, për ndërtim, për Ron Yefetin. Dhe sot ka shumë elementë.

Po dua përpara të shpjegoj. Ron Yefeti është zotëruesi 49% i kompanisë Timak sh.p.k. Timak sot zotëron 80% të kompanisë Timak Defense, ndërsa 20% zotërohen nga KAYO. Pra, ne e kemi denoncuar konceptin KAYO. Do dëgjoni në audiopërgjim, koncepti KAYO si koncept kriminal shtrihet sot në të gjithë damarët financiarë të shtetit në mënyrë kriminale.

ÇIM PEKA: I çfarë viti është audiopërgjimi?

ARBEN AHMETAJ: Është i janarit 2026. Të këtij viti. Pra, Ron Yefeti ka Timak Special Vehicles që i ndërrojnë emrin nga MAN në Land Cruiser, ia ndërrojnë në shkëmbi, Timak Defense e të tjera. Qesharake. Edhe kuptohet që aktori kryesor është kreu i organizatës, se do shikojmë pastaj në disa dokumenta shumë interesantë kontributin e Ron Yefetit këtu.

Pastaj ka UNO 18 me Arjeta Puca që kanë edhe këtë Advanced Arms Technology që praktikisht në audiopërgjim do kesh elementë të trafikut të armëve. Do kemi dhe Ermal Raketën. Ermal Nufin, sepse sot pseudonimin në Ministrinë e Mbrojtjes e ka Ermal Raketa.

ÇIM PEKA: Ministri aktual i Mbrojtjes?

ARBEN AHMETAJ: Ministri aktual i Mbrojtjes do ta them pak më vonë. Pastaj ke këto Timak Aviation me Arjeta Puca. Kush është Arjeta Puca? Do t’ia lëmë Plugut, se ka drejtues shumë interesantë tek Plugu.

Dhe pastaj ke Timak Horse Club, se sigurisht që kur vjedh paratë e buxhetit të shtetit, të duhen që të kalosh te jahtet, te avionët, te golfi, tek fërkimi nëpër hotelet në Itali me 10,000 euro apo 80,000 dollarë të katër bileta, apo nga një biznesmen 12 fluturime me charter, se s’ke ku të shkosh. Ky është kreu i organizatës.

Pra, pa dashje të gjithë përplasen nganjëherë dhe te Ekosi. Ku koordinatori ka bërë atë që ka bërë. Unë Ron Yefetin sot e quaj Ergys Agasi anglishtfolës. Ky personazh është identik Gysi Agasi ndërkombëtar. Identik.

Tani vijmë tek audiopërgjimet. Sigurisht që regjia është përgatitur. Këtu kam ofruar gjashtë raunde për të mos i marrë kohë shqiptarëve. Raundi i parë.