Në verën e këtij viti, pas një zvarritje prej 15 vitesh dhe një vlere prej qindra milionë dollarësh, më në fund u inaugurua rruga Qukës – Qafë Plloçë. Disa firma u shpërblyen për “punë të mirë”, madje morën disa herë shtesa kontratash apo fituan tenderat e rrugëve lidhëse.
“Dorën” e fundit e dha kompania 2T, me lidhje të forta me qeverinë. Një nga dy pronarët e firmës është Artan Sako, vëllai i kryetarit të zgjedhur së fundmi të Bashkisë së Tepelenës, Gramoz Sako. Më parë, Gramozi ka qenë edhe Komandant i Gardës së Republikës dhe njihet si një nga mbështetësit më mazhorancës.
Sipas dokumenteve janë paguar mbi 75 milionë dollarë për të ndërtuar segmentin 9.5 kilometër të lotit 3. Pikërisht në këtë pjesë rruge që rezulton se është edhe më e kushtueshmja, pas një shiu vjeshte pati shembje masive dheu si dhe çarje të rrugës. Pavarësisht se janë marrë miliona euro për 9.5 km rrugë, cilësia e punimeve është skandaloze.
Por jo vetëm kaq në datën 19 nëntor 2025, një ditë para se Drejtori i Përgjithshëm i Rrugëve Gentian Gjyli të njihej me masën e sigurisë “arrest shtëpie” për abuzime me detyrën, ai ka bërë edhe nderin e fundit. Tenderi i mirëmbajtjes së rrugës së florinjtë iu dha 2T-së, pavarësisht se s’kishte ofertën më të ulët.
Fondi limit ishte 31.8 milionë lekë, ose rreth 320 mijë euro. Firma “Rej” e familjes Kapri ka ofruan 24 milionë lekë. Firma fituese e Sakove kanë ofruar 29 milionë lekë. Dukshëm shumë herë më tepër sesa Kaprit.
Në tender kanë marrë pjesë edhe firma të tjera, sërish me oferta më të ulëta sesa Sakot. Alb-Building ka ofruar 26 milionë lekë, Deltarex 23 milionë, RSM ka ofruar madje 21 milionë lekë. Por Gjyli ia dha kompanisë 2T.